Termiz tumanida 6,3 million dollarlik infratuzilma loyihalari taqdimot qilindi
2025-07-17 18:30:00 / Yangiliklar
O‘zbekiston Respublikasi Iqtisodiyot va moliya vazirligi, Islom taraqqiyot banki va BMT Taraqqiyot dasturi (BMTTD) hamkorligida, “Qishloq joylarni kompleks rivojlantirish” loyihasining ikkinchi bosqichi doirasida Termiz tumanining 5 ta mahallasida – Yangiobod, At-Termiziy, Nurafshon, Orol va Yangihayot mahallalarida aholining turmush darajasini oshirishga qaratilgan yirik infratuzilma loyihalari amalga oshiriladi.
Bugun tuman hokimligida o‘tkazilgan taqdimotda BMTTD vakillari, mahalla fuqarolar yig‘inlari raislari, tashabbuskor guruh a’zolari va loyiha ishchi guruhi ishtirok etdi. Tadbir davomida mahallalarni rivojlantirish rejalarini ishlab chiqish jarayonlari, mavjud muammolar va ularni hal etish bo‘yicha taklif etilgan yechimlar muhokama qilindi.
Xususan, mahallalarda mavjud muammolar, har bir hudud uchun aniq rivojlanish rejasi, tashabbuskor guruhlar va aholi ishtirokida loyihalashtirish yondashuvlari bo‘yicha istiqbolli rejalar taqdim etildi.
Loyihadan ko‘zlangan maqsad – aholining yashash sharoitlarini yaxshilash infratuzilmani zamonaviy talablar asosida takomillashtirish, mahallalarning ijtimoiy-iqtisodiy imkoniyatlarini kengaytirishdir.
Bu loyiha nafaqat infratuzilmalarni yaxshilaydi, balki mahallalarda ijtimoiy faollikni oshirib, aholining o‘z kelajagini yaratishdagi ishtirokini kuchaytiradi.