"Kitobxonlik haftaligi" Axborot-kutubxona markaziga kitoblar taqdim etish bilan boshlandi
2025-04-21 15:40:00 / Yangiliklar
Bugundan boshlab mamlakatimiz bo‘ylab "O‘zbekiston – kitobxonlar yurti" shiori ostida V Respublika "Kitobxonlik haftaligi" start oldi. Joriy yil 27-apreliga qadar davom etadigan ushbu haftalik doirasida yangi kitoblar taqdimoti, kitob yarmarkalari, aksiya va viktorinalar, mahorat darslari, shoir va yozuvchilar bilan uchrashuvlar kabi ko‘plab madaniy-ma’rifiy tadbirlar o‘tkazilishi rejalashtirilgan.
Xususan, Termiz tumani Axborot-kutubxona markazida mazkur haftalikning ochilish marosimi bo‘lib o‘tdi. Tadbirda tuman hokimi Shuxrat Nazarov ishtirok etdi va kutubxona fondi uchun turli xildagi badiiy, siyosiy va ilmiy kitoblar jamlanmasini topshirdi.
Marosim davomida tuman rahbari kitobning inson ma’naviyati va bilim olishda tutgan o‘rni haqida fikr bildirib, barcha fuqarolarni "Kitobxonlik haftaligi"da faol ishtirok etishga chaqirdi.
Tadbir doirasida yoshlar o‘rtasida kitobxonlikka bag‘ishlangan viktorinalar, musiqa va she’riyat kechalari, shuningdek, mahalliy yozuvchi va shoirlar ishtirokida ijodiy uchrashuvlar tashkil etildi.