Vazirlar Mahkamasining 732-sonli qarori bilan tasdiqlangan rasmiy hujjatlarga apostil qo‘yish bo‘yicha davlat xizmati ko‘rsatishning Ma’muriy reglamentiga asosan jismoniy va yuridik shaxslarga vakolatli davlat organlari tomonidan O‘zbekiston Respublikasi hududida tuzilgan rasmiy hujjatlarga “Apostille” maxsus shtampini qo‘yish bo‘yicha davlat xizmati ko‘rsatiladi.

Apostil bilan Xorijiy rasmiy hujjatlarni legallashtirish talabini bekor qiluvchi konvensiyaning 5-moddasiga muvofiq, rasmiy hujjatni imzolagan mansabdor shaxsning imzosi haqiqiyligi, imzolash vakolati mavjudligi hamda hujjatni tasdiqlagan muhr yoki shtamp bosma izi haqiqiyligi tasdiqlanadi.

Sudlanmaganlik to‘g‘risidagi ma’lumotnomaga, sudlardan chiqadigan rasmiy hujjatlar bo‘yicha apostil qo‘yish davlat xizmati Oliy sud tomonidan amalga oshiriladi.

Murojaat etuvchi davlat xizmati olish uchun davlat xizmatlari markaziga o‘zi kelgan holda yoki YaIDXPda ro‘yxatdan o‘tgan holda elektron tarzda murojaat etish mumkin.

So‘rovnomani ko‘rib chiqish uchun bazaviy hisoblash miqdorining 10 foizi miqdorida yig‘im undiriladi. (YaIDXP) orqali ro‘yxatdan o‘tganda esa yigim summasining 90 foizi miqdorida davlat boji to‘lanadi.

So‘rovnoma rasmiy hujjatlar taqdim etilgan kundan boshlab vakolatli organ tomonidan ikki ish kuni ichida ko‘rib chiqiladi.

Fuqarolik ishlari bo‘yicha termiz tumanlaro sudi sudyasi R.Tillayev