Surxondaryo viloyati Termiz tumani hokimligi

Termiz tumani hokimi Shuxrat Qalandarov rahbarligida korrupsiyaga qarshi kurashish sohasidagi davlat siyosati ijrosini ta’minlash, Prezidentimiz tomonidan belgilangan ustuvor vazifalar ijrosini samarali tashkil etish hamda sohadagi mavjud muammo va kamchiliklarni tahlil qilishga bag‘ishlangan kengaytirilgan yig‘ilish bo‘lib o‘tdi.

Yig‘ilishda tuman hokimining sohalar bo‘yicha o‘rinbosarlari, hokimlik apparati xodimlari, huquqni muhofaza qiluvchi organlar va nazorat idoralari vakillari, shuningdek, tumandagi tashkilot va muassasalar rahbarlari ishtirok etdi.

Yig‘ilish avvalida mamlakatimizda korrupsiyaga qarshi murosasiz kurashish, davlat organlari faoliyatida ochiqlik va shaffoflikni ta’minlash, aholiga sifatli davlat xizmatlari ko‘rsatish hamda davlat mablag‘laridan oqilona va maqsadli foydalanish borasida amalga oshirilayotgan islohotlarning mazmun-mohiyatiga to‘xtalib o‘tildi.

Tadbir davomida tumanda korrupsiyaning oldini olish, korrupsiyaviy xavf-xatarlarni barvaqt aniqlash va ularni keltirib chiqaruvchi omillarni bartaraf etish, davlat xaridlari jarayonlarining qonuniyligini ta’minlash, budjet mablag‘larining sarflanishi ustidan ta’sirchan nazoratni kuchaytirish, manfaatlar to‘qnashuvining oldini olish, xizmat intizomiga qat’iy rioya qilish hamda ijro intizomini mustahkamlash masalalari atroflicha muhokama qilindi.

Shuningdek, aholi murojaatlari bilan ishlash tizimi, har bir murojaatni qonunchilik talablari asosida ko‘rib chiqish, sun’iy to‘siqlarga yo‘l qo‘ymaslik, davlat xizmatlarini ko‘rsatishda inson omilini qisqartirish, raqamlashtirish imkoniyatlaridan keng foydalanish orqali korrupsiyaviy holatlarning oldini olish yuzasidan amalga oshirilayotgan ishlar tahlil qilindi.

Tuman hokimi Shuxrat Qalandarov har bir rahbar o‘z faoliyatida halollik, qonuniylik va mas’uliyat tamoyillariga qat’iy amal qilishi shartligini ta’kidlab, korrupsiyaning har qanday ko‘rinishiga nisbatan murosasiz munosabat shakllantirish, ichki nazorat tizimini kuchaytirish, budjet mablag‘lari sarfi, qurilish ishlari, davlat xaridlari, ijtimoiy soha va yer munosabatlarida qonunchilik talablariga so‘zsiz rioya etilishini ta’minlash bo‘yicha qat’iy vazifalarni belgilab berdi.

Yig‘ilishda sohalar kesimida yo‘l qo‘yilgan ayrim kamchiliklar tanqidiy muhokama qilinib, ularni bartaraf etish, mas’ullarning shaxsiy javobgarligini oshirish, korrupsiya xavfi yuqori bo‘lgan yo‘nalishlarda ta’sirchan ichki nazorat mexanizmlarini joriy etish hamda profilaktik tadbirlarni izchil davom ettirish bo‘yicha aniq topshiriqlar berildi.

Ta’kidlanganidek, korrupsiyaga qarshi kurashish faqat huquqni muhofaza qiluvchi organlarning emas, balki har bir davlat xizmatchisi va rahbarning kundalik faoliyatidagi ustuvor vazifasi hisoblanadi. Bu borada qonun ustuvorligini ta’minlash, fuqarolarning davlat organlariga bo‘lgan ishonchini mustahkamlash hamda ochiq va shaffof boshqaruv tizimini qaror toptirish yo‘lida barcha mas’ullardan yuqori mas’uliyat va tashabbuskorlik talab etilishi qayd etildi.

Yig‘ilish yakunida muhokama qilingan masalalar yuzasidan mas’ullarga aniq vazifalar belgilab berildi hamda korrupsiyaga qarshi kurashish ishlarini yangi bosqichga olib chiqish, har bir tashkilotda profilaktik chora-tadbirlarni kuchaytirish va belgilangan topshiriqlar ijrosini qat’iy nazoratga olish yuzasidan tegishli ko‘rsatmalar berildi.