Surxondaryo viloyati Termiz tumani hokimligi

Hurmatli tumandoshlar! Aziz yoshlar!

Bugungi kunda giyohvandlik va psixotrop moddalar iste’moli nafaqat bir insonning hayoti va salomatligiga, balki oila tinchligi, mahalla osoyishtaligi va jamiyat taraqqiyotiga ham jiddiy xavf tug‘dirayotgan dolzarb muammolardan biri hisoblanadi. Bu illat insonning sog‘lig‘ini izdan chiqarib, uning orzu-intilishlari va kelajak rejalariga putur yetkazadi.

Yurtimizda yoshlarning bilim olishi, zamonaviy kasb-hunarlarni egallashi, sport bilan muntazam shug‘ullanishi va tadbirkorlik faoliyatini yo‘lga qo‘yishi uchun keng imkoniyatlar yaratilmoqda. Ana shunday sharoitda ayrim noqonuniy kuchlarning giyohvandlik vositalari va psixotrop moddalarni tarqatishga bo‘lgan urinishlari har birimizdan ogohlik va fuqarolik mas’uliyatini talab etadi.

Aziz yoshlar!

Sizlar mamlakatimiz kelajagi, Yangi O‘zbekistonning ishonchli tayanchisiz. Hayotingiz va kelajagingizga salbiy ta’sir ko‘rsatadigan har qanday zararli odatlardan uzoq bo‘ling. Bo‘sh vaqtingizni ilm-fan, sport, kitobxonlik, kasb o‘rganish va ezgu maqsadlarga erishish yo‘lida samarali sarflang. Unutmang, sog‘lom turmush tarzi — muvaffaqiyatli va baxtli hayotning eng mustahkam asosidir.

Hurmatli ota-onalar, ustozlar va mahalla faollari!

Farzandlarimizning tarbiyasi va kelajagi uchun barchamiz birdek mas’ulmiz. Ularning qiziqishlari, atrofidagi muhiti va kundalik mashg‘ulotlariga befarq bo‘lmaylik. Oila, ta’lim muassasalari va mahalla hamkorligi orqali yoshlarimizni turli zararli ta’sirlardan asrash, ularni sog‘lom va barkamol insonlar etib voyaga yetkazishimiz mumkin.

Shu munosabat bilan barcha yurtdoshlarimizni giyohvandlikka qarshi kurashda faol ishtirok etishga, yoshlar o‘rtasida sog‘lom turmush tarzini targ‘ib qilishga va kelajagimiz egalari bo‘lgan farzandlarimizni asrab-avaylash yo‘lida birlashishga chaqiraman.

Kelajagimiz, farzandlarimiz va yurtimiz ravnaqi uchun birgalikda harakat qilaylik!

Sog‘lom avlod — xavfsiz va farovon jamiyat poydevoridir.