Surxondaryo viloyati Termiz tumani hokimligi

Mamlakatimizda qonun ustuvorligini ta’minlash, jamiyatda adolat va oshkoralikni qaror toptirish, fuqarolarning huquqiy madaniyatini oshirishga yo‘naltirilgan keng ko‘lamli islohotlar izchil amalga oshirilmoqda. Termiz tumanida ham huquqbuzarliklarning oldini olish, jinoyatchilikni kamaytirish va korrupsiyaga qarshi kurashish borasida tizimli chora-tadbirlar olib borilmoqda.

Bu chora-tadbirlar nafaqat davlat idoralari, balki mahalliy o‘zini-o‘zi boshqarish organlari, ta’lim muassasalari, fuqarolik jamiyati institutlari va keng jamoatchilik ishtirokida amalga oshirilib, butun jamiyatni qamrab olgan holda olib borilmoqda.

Huquqbuzarliklarning oldini olish — xavfsiz jamiyat sari muhim qadam.

Tumanimizda mahallaning aholi va davlat organlari o‘rtasida ishonchli "ko‘prik" bo‘lishini ta’minlash, xalqimizning tinch va osoyishta hayot kechirishi uchun zarur shart-sharoitlar yaratish borasida tizimli ishlar amalga oshirilayotgan bo‘lib, "Obod va xavfsiz mahalla" tamoyili asosida har bir mahallada muammolarni joyida aniqlab, kompleks yondashuv asosida hal etish mexanizmlari joriy etilgan.

Huquqbuzarliklarning oldini olish maqsadida mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektori jamoatchilik asosida faoliyat yuritadigan "mahalla yettiligi" tomonidan ijtimoiy profilaktika tadbirlari, sh.j. fuqarolar bilan uchrashuvlar, ma’naviy-ma’rifiy tadbirlar o‘tkazilmoqda. Ushbu tadbirlar orqali aholiga amaldagi qonunlar, huquq va majburiyatlar, huquqbuzarliklar uchun belgilangan javobgarlik tartiblari tushuntirilmoqda.

Yoshlar o‘rtasida huquqiy bilimlarni mustahkamlash maqsadida maktab va boshqa o‘quv muassasalarida "Huquqiy soatlar",  davra suhbatlari, interaktiv mashg‘ulotlar, tanlovlar va ijtimoiy loyihalar tashkil etilmoqda.

Bunday tadbirlar orqali yosh avlodning huquqbuzarliklarga nisbatan murosasiz munosabati shakllantirilmoqda.
Shu bilan birga, "ijtimoiy xavfli guruh"ga kiruvchi fuqarolar bilan individual tarzda ish olib borish, ularni jamiyatga faol jalb etish, ish bilan ta’minlash masalalariga ham alohida e’tibor qaratilmoqda.
 
Kundalik hayotdagi korrupsiyaga chek qo‘yish — asosiy maqsadlardan biri.

Korrupsiya jamiyat taraqqiyotiga, davlatning nufuziga jiddiy salbiy ta’sir ko‘rsatadi. Shu bois tumanda davlat xizmatlarini ko‘rsatish jarayonlarini to‘liq raqamlashtirish, inson omilini cheklash va oshkoralikni ta’minlash orqali kundalik hayotdagi poraxo‘rlik va g‘arazli munosabatlarning oldi olinmoqda.

Tumandagi ko‘plab davlat tashkilotlari, ayniqsa aholi bilan bevosita ishlovchi tuzilmalarda, elektron navbat tizimlari, onlayn murojaat va xizmat platformalari, "Yagona interaktiv davlat xizmatlari portali" orqali xizmat ko‘rsatish amaliyoti yo‘lga qo‘yilgan. 

Bu esa fuqarolarning davlat idoralariga to‘g‘ridan-to‘g‘ri murojaat qilishi, hujjatlarni ortiqcha ovoragarchiliksiz, shaffof va tezkor olishiga xizmat qilmoqda. Korrupsiyaga qarshi kurash bo‘yicha hududiy kengash faoliyat yuritib, har bir muassasa va tashkilotda korrupsiyaviy xavflar tahlili olib boriladi, xizmatchilarning mas’uliyati kuchaytiriladi.

Xulosa o‘rnida: Termiz tumanida huquqbuzarliklar profilaktikasi va korrupsiyaga qarshi kurashni yanada kuchaytirish maqsadida barcha darajadagi idora va tashkilotlar, fuqarolik jamiyati vakillari va faol fuqarolar hamkorligida izchil ishlar amalga oshirilmoqda. Jamiyatda qonun ustuvorligini ta’minlash, adolat va shaffoflikni qaror toptirish, har bir fuqaroning huquqlarini kafolatlash — bugungi kunning asosiy vazifasidir. Ushbu yo‘nalishdagi ishlar uzluksiz davom ettirilib, Termiz tumanini huquqiy, barqaror va adolatli hududga aylantirish maqsad qilib qo‘yilgan.