Kelajak mahallasida 90 o‘rinli yangi davlat maktabgacha ta’lim tashkiloti foydalanishga topshirildi
2026-03-27 14:05:00 / Yangiliklar
Termiz tumanining Kelajak mahallasida umumiy qiymati 1 mlrd 140 mln so‘mlik loyiha doirasida barpo etilgan 90 o‘rinli yangi davlat maktabgacha ta’lim tashkiloti foydalanishga topshirildi. Tantanali ochilish marosimida Termiz tumani hokimi Shuxrat Qalandarov ishtirok etib, mahalla ahlini ushbu quvonchli voqea bilan samimiy qutladi.
Mazkur bog‘chaning ishga tushirilishi natijasida Yangiyer va Kelajak mahallalaridagi 90 nafar maktabgacha ta’lim yoshidagi bolalar qamrab olinadi. Shu bilan birga, 24 ta yangi doimiy ish o‘rni yaratildi.
Tuman rahbari nuroniylar va ishtirokchilar bilan yangi bog‘chada yaratilgan zamonaviy shart-sharoitlar bilan tanishdi hamda tarbiyalanuvchilarga sovg‘alar topshirdi.
Yangi bog‘cha – kelajagimiz egalari bo‘lgan farzandlarimiz uchun yanada qulay va zamonaviy ta’lim-tarbiya muhitini yaratish yo‘lida navbatdagi qadam bo‘ldi.
Ma’lumot o‘rnida, bunga qadar tumandagi maktabgacha ta’lim tashkilotlari soni 118 tani tashkil etib, qamrov darajasi 89,5 foizga yetgan edi. Yangi muassasaning ishga tushirilishi natijasida mazkur ko‘rsatkich 90 foizdan oshdi.