Surxondaryo viloyati Termiz tumani hokimligi

Hukumat qarori (48-son, 09.02.2026 y.) bilan “Zo‘ravonlikdan jabrlangan, o‘ziga nisbatan zo‘ravonlik sodir etilishi xavfi ostida va ijtimoiy jihatdan xavfli ahvolda bo‘lgan bolalar hamda ularning oilalariga ijtimoiy xizmatlarni tashkil qilish tartibi to‘g‘risida”gi nizom tasdiqlandi.

Nizomga ko‘ra, ijtimoiy xizmatlar zo‘ravonlikdan jabrlangan, o‘ziga nisbatan zo‘ravonlik sodir etilishi xavfi ostida bo‘lgan bolalar va ularning oilalari uchun himoya qilish rejasiga muvofiq ko‘rsatiladi.

 Ijtimoiy jihatdan xavfli ahvolda bo‘lgan bolalar va ularning oilalari uchun individual integratsiya rejasiga muvofiq ko‘rsatiladi.

Ijtimoiy himoyaga muhtoj bolalar va ularning oilalariga quyidagi shakllarda ijtimoiy xizmatlar ko‘rsatiladi:

 ijtimoiy himoyaga muhtoj bolalar uchun:

• 6 oygacha bo‘lgan muddatga qisqa muddatli ijtimoiy xizmatlar;
• 1-yilgacha bo‘lgan muddatga uzoq muddatli ijtimoiy xizmatlar;
• 1-yilgacha bo‘lgan muddatga tun-u kun ko‘rsatiladigan ijtimoiy xizmatlar;

ijtimoiy himoyaga muhtoj bolalar va ularning oilalari uchun "Mehrli oila" xizmati.

Ijtimoiy xizmatlar ko‘rsatish istagini bildirgan YATT yoki yuridik shaxslar "Yagona milliy ijtimoiy himoya" axborot tizimining ("Ijtimoiy himoya" AT) Ijtimoiy xizmatlar ko‘rsatuvchilarning yagona reestriga kiritilishi lozim.

"Ijtimoiy himoya" ATda ro‘yxatdan o‘tish uchun talabgor tomonidan so‘rovnoma to‘ldiriladi.

So‘rovnoma 10 ish kuni ichida talabgorning quyidagi talablarga muvofiqligi bo‘yicha o‘rganib chiqiladi:

talabgorda kamida 2 nafar psixoijtimoiy xizmat ko‘rsatuvchi mutaxassislarning mavjudligi va ularning kamida 1-yillik ish stajiga ega bo‘lishi hamda sog‘lig‘i to‘g‘risidagi tibbiy ma’lumotnomaning bo‘lishi;

bino va inshootlarda sanitariya holati ta’minlanganligi.

So‘rovnoma tasdiqlanganidan so‘ng talabgor Yagona reestrga kiritiladi va bu to‘g‘risida uning "Ijtimoiy himoya" ATdagi shaxsiy kabinetiga elektron xabarnoma yuboriladi.

Fuqarolik Ishlari bo‘yicha Termiz tumanlaro sudining sudyasi R.Tillayev