At-Termiziy mahallasida amalga oshirilayotgan infratuzilma loyihalari ijrosi o‘rganildi
2026-01-08 13:25:00 / Yangiliklar
Xabar berilganidek, Termiz tumanidagi 5 ta mahallada Iqtisodiyot va moliya vazirligi, Islom taraqqiyot banki hamda BMTTD hamkorligida "Qishloq joylarni kompleks rivojlantirish" dasturining ikkinchi bosqichi doirasida 6,3 million dollarlik infratuzilma loyihalari amalga oshirilishi rejalashtirilgan.
Bugun Termiz tumani hokimi Shuxrat Qalandarov At-Termiziy mahallasida mazkur dastur doirasida ichimlik suvi tarmog‘i tortish, salomatlik va ijtimoiy yo‘lak qurish loyihalarining ijrosini o‘rgandi. Xususan, mahallada 1 kilometr salomatlik va ijtimoiy yo‘lak, 52 ta tungi yoritish chiroqlari, 32 kilometr ichimlik suvi tarmoqlari tortish ishlari amalga oshirilmoqda.
Tuman rahbari loyihalar ijrochilari, mas’ullar va "mahalla yettiligi" a’zolari bilan mahallaning asosiy ko‘chasi bo‘ylab qurilish-ta’mirlash ishlarini ko‘zdan kechirdi. Loyihalarni amalga oshirish bilan bog‘liq muammolar joyida o‘rganilib, yechimi yuzasidan mas’ullarga vazifalar belgilab berildi.
Loyihalarni tizimli va bosqichma-bosqich amalga oshirgan holda kelgusida aholi uchun qulay, tarmoqlarga xizmat ko‘rsatishda bir-biriga xalaqit qilmaydigan yo‘nalishlarda qurish lozimligi qayd etildi.