Seminar: O‘zbekiston Respublikasi Prezidentining PQ-322-son qarori doirasida chorvachilikni rivojlantirish zamonaviy yondashuv va amaliy natijalar mavzusida.
2026-08-14 13:20:00 / Yangiliklar
Shu maqsadda O‘zbekiston Respublikasi Prezidentining “Aholini oziq-ovqat mahsulotlari bilan barqaror ta’minlashga doir qo‘shimcha chora-tadbirlar to‘g‘risida”gi PQ-322-son qarori doirasida hududlarda chorvachilik tarmog‘ini rivojlantirish, ishlab chiqarish hajmini oshirish va xo‘jaliklarni qo‘llab-quvvatlashga qaratilgan amaliy ishlar olib borilmoqda.
Ayni paytda tumanda chorvachilik yo‘nalishida salmoqli ishlar amalga oshirilmoqda. Hududda 20 ta chorvachilik va 12 ta qo‘ychilik xo‘jaligi faoliyat yuritib, ularda 3 mingdan ortiq qoramol hamda 21 mingdan ziyod qo‘y parvarishlanmoqda.
Kelgusida chorva naslini yaxshilash va yuqori mahsuldorlikka erishish maqsadida xorijdan 2 ming 500 bosh naslli qoramol olib kelish rejalashtirilgan. Jumladan, sut va go‘sht yo‘nalishlarida Simmental, Qizil cho‘l va Golshteyn zotlari, qo‘ychilik yo‘nalishida esa Mongoliyadan Dorper zotli qo‘ylarni olib kelish ko‘zda tutilmoqda.
Ana shu yo‘nalishdagi ishlarni amaliy jihatdan ko‘rsatish, chorvachilikni zamonaviy asosda tashkil etish, naslli qoramollar sonini ko‘paytirish va sifatli oziq-ovqat mahsulotlari ishlab chiqarishni kengaytirish maqsadida tuman hokimi o‘rinbosari Elyor Toshev boshchiligida seminar tashkil etildi.
Bugun “Qizilqal’a” massivi hududida faoliyat yuritayotgan “EBS-ARCHITECTURAL” fermer xo‘jaligida tuman hokimi o`rinbosari Elyor Toshev hamda charvachik kompleks sektori vakillari ishtirokida seminar tashkil etildi.
Mazkur xo‘jalik dehqonchilik va chorvachilikni uyg‘un rivojlantirayotgan namunali subyektlardan biri hisoblanadi. Xo‘jalikda naslli Simmental va Angus zotli qoramollar parvarish qilinmoqda. Ushbu zotlardan foydalanish go‘sht va sut mahsulotlari sifatini hamda ishlab chiqarish samaradorligini oshirishda muhim omil bo‘lmoqda.
Bugungi kunda xo‘jalikda jami 50 bosh qoramol boqilmoqda. Ularning asosiy qismini yuqori mahsuldor naslli qoramollar tashkil etadi. Xo‘jalik mutaxassislarining ta’kidlashicha, zamonaviy parvarish usullarini qo‘llash, chorva uchun sifatli ozuqa bazasini yaratish va naslchilik ishlarini to‘g‘ri yo‘lga qo‘yish orqali mahsuldorlikni yanada oshirish maqsad qilingan.
Loyiha doirasida kelgusida yiliga 20 tonnadan ortiq go‘sht va 40 tonnagacha sut ishlab chiqarish rejalashtirilgan. Bu esa hudud aholisini sifatli oziq-ovqat mahsulotlari bilan ta’minlash, ichki bozorni mahalliy mahsulotlar bilan boyitish va import o‘rnini bosuvchi mahsulotlar hajmini oshirishga xizmat qiladi.
Seminar davomida chorvachilikda zamonaviy texnologiyalarni keng joriy etish, naslchilik ishlarini takomillashtirish, yem-xashak bazasini mustahkamlash, chorva mahsuldorligini oshirish hamda fermer xo‘jaliklarini qo‘llab-quvvatlash masalalariga alohida e’tibor qaratildi.
Ta’kidlanganidek, chorvachilikni rivojlantirish nafaqat xo‘jaliklarning iqtisodiy samaradorligini oshiradi, balki aholini go‘sht va sut mahsulotlari bilan barqaror ta’minlash, yangi ish o‘rinlari yaratish hamda hudud iqtisodiy salohiyatini yuksaltirishda ham muhim ahamiyatga ega.