Olot tumanida iqlim sharoitida suvdan samarali foydalanishga bag‘ishlangan o‘quv-trening o‘tkazildi.
2026-07-17 12:25:00 / Yangiliklar
Tadbirda suv yetkazib berish xizmati muassasalari vakillari, suv xo‘jaligi tashkilotlari mutaxassislari, muhandis-gidrotexniklar, mahalliy mas’ullar hamda fermer xo‘jaliklari rahbarlari ishtirok etdi.
O‘quv-treningni soha mutaxassislari Rustam Muradov va Malika Ikramova olib borib, ishtirokchilarga iqlim o‘zgarishi sharoitida suv resurslaridan oqilona foydalanish, qishloq xo‘jaligi ekinlari uchun ilmiy asoslangan sug‘orish rejimini ishlab chiqish hamda zamonaviy usullarni amaliyotga tatbiq etish bo‘yicha batafsil ma’lumotlar berdilar.
Mashg‘ulotlar davomida global iqlim o‘zgarishining sug‘orma dehqonchilikka ta’siri, ekinlarning suvga bo‘lgan ehtiyojini iqlim ko‘rsatkichlari asosida aniqlash, sug‘orish muddatlari va me’yorlarini belgilashning ilmiy asoslari atroflicha yoritildi. Shuningdek, sug‘orish rejimiga ta’sir etuvchi tabiiy va xo‘jalik omillari, zamonaviy hisoblash metodlari hamda raqamli dasturlardan foydalanish imkoniyatlari haqida amaliy tavsiyalar berildi.
Trening davomida suv iste’molchilarining huquq va majburiyatlari, suvdan samarali foydalanishning huquqiy asoslari ham muhokama qilinib, ishtirokchilarni qiziqtirgan savollarga mutaxassislar tomonidan batafsil javoblar berildi.
Amaliy mashg‘ulotlarda qatnashchilar iqlim ma’lumotlarini tahlil qilish, ekinlar uchun suv sarfini hisoblash, sug‘orish jadvalini tuzish hamda turli sharoitlarda maqbul qarorlar qabul qilish bo‘yicha zarur ko‘nikmalarga ega bo‘ldilar.
Mazkur o‘quv-trening suv resurslaridan samarali va tejamkor foydalanish, qishloq xo‘jaligida zamonaviy yondashuvlarni keng joriy etish, fermerlar hamda soha mutaxassislarining bilim va malakasini oshirish, shuningdek, Orolbo‘yi hududlarida barqaror qishloq xo‘jaligini rivojlantirish yo‘lidagi muhim qadamlardan biri bo‘ldi.