Olot tumani jamoasi “Nasriddin Afandi” va “Sharq taomlari” festivallarida e’tirof etildi.
2026-04-01 22:25:00 / Yangiliklar
Festival qadimiy shahar ko‘chalari bo‘ylab o‘tgan rang-barang karvon yurishi bilan boshlandi. Nasriddin Afandi boshchiligidagi ishtirokchilar Poyi Kalon majmuasi, Ark qo‘rg‘oni hamda Nodir Devonbegi madrasasi yo‘nalishida yurib, tomoshabinlarga unutilmas manzaralar taqdim etdi. Milliy kuy-qo‘shiqlar, folklor-etnografik jamoalar chiqishlari, qo‘g‘irchoqlar nafaqat mahalliy aholi, balki xorijiy sayyohlarda ham katta qiziqish uyg‘otdi.
Festival doirasida o‘tkazilgan “Sharq taomlari” ko‘rgazmasi esa milliy oshxonamizning betakrorligini yana bir bor namoyish etdi. Turli hududlar va xalqlarga xos taomlar orqali mehmonlar Sharq pazandachilik an’analari, ta’m va madaniyat uyg‘unligini his qilish imkoniga ega bo‘ldi.
Kun davomida konsert dasturlari, hunarmandchilik yarmarkalari, folklor jamoalari chiqishlari bayram kayfiyatini yanada oshirdi. Ayniqsa, viloyatning turli hududlaridan tashrif buyurgan jamoalar o‘z dasturlari bilan festivalga o‘zgacha ruh bag‘ishladi.
Mazkur nufuzli tadbirda Olot tumani jamoasi ham faol ishtirok etib, o‘zining boy dasturxoni, milliy taomlari hamda mehmon do`stligi bilan ajralib turdi. Jamoamiz “Sayyohlar e’tirof etgan tomosha” nominatsiyasi g‘olibi deb topildi.
Bu yutuq Olot tumani jamoasining nafaqat pazandachilik, balki madaniy-ma’rifiy yo‘nalishdagi salohiyati yuksak ekanini namoyon etdi.
Festival esa o‘z navbatida turli xalqlar o‘rtasida do‘stlik, hamjihatlik va madaniy aloqalarni yanada mustahkamlamoqda.