Alisher Navoiy tavalludi munosabati bilan tantanali marosim hamda matbuot anjumani o‘tkazildi.
2026-02-09 08:00:00 / Yangiliklar
Mamlakatimizda bobokalonimiz xotirasini e’zozlash, uning asarlarini chuqur o‘rganish va keng targ‘ib etishga alohida e’tibor qaratilmoqda. Shu munosabat bilan tashkil etilgan tadbir “Bayot” mahallasida joylashgan Alisher Navoiy haykali poyiga gullar qo‘yish marosimi bilan boshlandi. Unda keng jamoatchilik vakillari ishtirok etib, buyuk ajdodimiz xotirasiga hurmat bajo keltirdilar.
Tadbirda tuman hokimi Nargiza Nematova, nuroniylar, ijodkor ziyolilar hamda ta’lim muassasalari vakillari qatnashdi. So‘zga chiqqanlar Navoiy merosining bugungi kunda yoshlar tarbiyasidagi o‘rni, uning asarlarida ilgari surilgan komil inson g‘oyasi haqida fikr bildirdilar.
Shuningdek, “Navoiyga ehtirom” mavzusida adabiy-badiiy tadbir tashkil etildi. Unda shoirlar Abunabi Hamro, Jo‘ra Hamro hamda Shuxrat Sulaymonov Navoiyning ma’naviy merosi haqida so‘z yuritib, shoir ruhiga bag‘ishlangan yangi she’rlarini o‘qib eshittirdilar.
Maktab o‘quvchilari tomonidan Navoiy g‘azal va ruboiylari yoddan ijro etilib, sahna ko‘rinishlari namoyish qilindi. Yosh avlodning buyuk mutafakkir ijodiga bo‘lgan qiziqishi va hurmati tadbir davomida yaqqol namoyon bo‘ldi.
Tadbir doirasida matbuot anjumani ham tashkil etilib, unda Navoiy merosini o‘rganish, targ‘ib qilish va yoshlar ongiga singdirish borasidagi istiqboldagi rejalar yuzasidan fikr almashildi.
Mazkur tadbir buyuk shoir ijodining bugungi avlod tarbiyasida tutgan beqiyos o‘rnini yana bir bor tasdiqladi hamda milliy qadriyatlarimizga bo‘lgan ehtiromni mustahkamladi.