Buxoro viloyati Olot tumani hokimligi

Mazkur topshiriq ijrosi doirasida Buxoro davlat texnika universitetining bitiruvchi talabalari "Bo‘ribek Chandir" mahallasiga biriktirilib, hududni kompleks rivojlantirishga qaratilgan bosh rejani ishlab chiqish ishlariga jalb etildi. Ushbu tashabbus yosh mutaxassislar uchun nazariy bilimlarini amaliyot bilan uyg‘unlashtirish, mahalla hayotidagi real muammolarni o‘rganish va ularga aniq yechimlar taklif etish imkonini bermoqda.

Mazkur yo‘nalishda universitetda maxsus shtab tashkil etilib, mas’ul tashkilotlar va mutasaddi idoralar bilan hamkorlikda mahallalarning bosh rejasi yuzasidan amaliy takliflar ishlab chiqilmoqda. Jumladan, bugun Bo‘ribek Chandir mahallasining ijtimoiy-iqtisodiy holati joyida o‘rganilib, mavjud infratuzilma, aholining bandligi, tadbirkorlik salohiyati va rivojlanish imkoniyatlari tahlil qilindi.

Talabalar tomonidan mahallada infratuzilmani yaxshilash, muhandislik-kommunikatsiya tarmoqlarini rivojlantirish, kichik biznes va tadbirkorlikni qo‘llab-quvvatlash, xizmatlar sohasini kengaytirish bo‘yicha bir qator amaliy takliflar ishlab chiqilmoqda. Shuningdek, aholi uchun qulay yashash muhitini yaratishga qaratilgan loyiha yechimlari taklif etilmoqda.

Ishlab chiqilayotgan bosh rejalar qurilish, energetika, qishloq xo‘jaligi va xizmatlar sohalarini rivojlantirishni o‘z ichiga olgan holda, mahallaning kompleks taraqqiyotini ta’minlashga qaratilgan. Shu bilan birga, mazkur jarayon talabalar uchun dual ta’lim asosida muhim amaliy tajriba maktabi vazifasini o‘tab, ularning kelajakdagi kasbiy faoliyatida mustahkam poydevor bo‘lib xizmat qilmoqda.

Mazkur tashabbus orqali mahallalarni rivojlantirishga ilm-fan va yosh mutaxassislar salohiyatini jalb etish, hududlarda barqaror rivojlanishni ta’minlash yo‘lida muhim qadam tashlanmoqda.