Buxoro viloyati Olot tumani hokimligi

Shu qutlug‘ damlarda, avvalo, butun tumanimiz ahlini, barcha olotliklarni jonajon Vatanimiz — O‘zbekistonimizga muborak qadamlar bilan kirib kelayotgan Yangi 2026-yil bilan chin dildan, samimiy tabriklayman.

Aziz tumandoshlar!
Yakunlanib borayotgan “Atrof-muhitni asrash va ‘yashil’ iqtisodiyot yili” tumanimiz hayotida barakali, sermazmun va samarali yil bo‘ldi. Ushbu yilda erishilgan natijalar zamirida barcha soha vakillarining fidokorona mehnati, tashabbuskorligi va mas’uliyati mujassam ekanini alohida ta’kidlash joiz.

Ayniqsa, mamlakatimizda olib borilayotgan izchil islohotlar va oqilona davlat siyosati samarasi xalqimiz turmush darajasini yaxshilash, aholini ijtimoiy himoya qilish, keksalarni e’zozlash, yoshlarga keng imkoniyatlar yaratish, eng muhimi, yurtimizda tinchlik va osoyishtalikni mustahkamlash yo‘lida o‘zining yaqqol samarasini ko‘rsatmoqda.

Joriy yilda tumanimizda har bir soha bo‘yicha salmoqli natijalarga erishildi. “Obod xonadon – obod ko‘cha – obod mahalla” dasturi doirasida amalga oshirilgan qurilish va bunyodkorlik ishlari tuman markazidan tortib, eng chekka qishloqlarnigacha qamrab oldi.

Qayta tiklanuvchi energiya manbalarini joriy etish borasida quvvati 250 megavatt bo‘lgan yirik loyiha amalga oshirildi, qo‘shimcha ravishda 3 MVt quvvatli quyosh panellari o‘rnatildi. Elektr ta’minotini yaxshilash maqsadida og‘ir toifadagi mahallalarda yangi transformator punktlari o‘rnatilib, elektr tarmoqlari yangilandi. Natijada minglab xonadonlarning elektr ta’minoti sezilarli darajada yaxshilandi.

Shuningdek, yo‘l, ichimlik suvi va kommunal infratuzilmani rivojlantirish bo‘yicha keng ko‘lamli ishlar amalga oshirilib, aholining hayot sifati yanada yuksaltirildi.

Ijtimoiy soha – doimiy e’tibor markazida

Kambag‘allikni qisqartirish, aholini bandlik bilan ta’minlash, tadbirkorlikni qo‘llab-quvvatlash, yoshlar va xotin-qizlar bilan ishlash tumanimizda ustuvor vazifa sifatida amalga oshirildi. Minglab yangi ish o‘rinlari yaratildi, tadbirkorlik qilish istagida bo‘lgan fuqarolarga imtiyozli kreditlar va subsidiyalar ajratildi.

“Yoshlar daftari” va “Ayollar daftari” orqali minglab oilalarning muammolari hal etildi. Ta’lim, tibbiyot va ijtimoiy himoya sohalarida amalga oshirilgan ishlar xalqimiz farovonligini ta’minlashga xizmat qildi.

Muhtaram vatandoshlar!
2026-yil mamlakatimizda “Mahallani rivojlantirish va jamiyatni yuksaltirish yili” deb e’lon qilindi. 

Yangi yilda mahalla infratuzilmasini yanada yaxshilash, iqtisodiyotni innovatsion rivojlanish bosqichiga olib chiqish, ichki bozorda talabni rag‘batlantirish, kasblarni rivojlantirish va mehnat bozorini zamonaviylashtirish, ekologik muvozanatni ta’minlash va “yashil” energetikani keng joriy etish, zamonaviy davlat boshqaruvi va adolatli sud-huquq tizimini mustahkamlash kabi ustuvor vazifalar izchil davom ettiriladi.

Ishonchim komilki, 2026-yil tumanimiz va yurtimiz hayotida yangi yutuqlar, ulkan marralar va farovonlik sari dadil qadamlar yili bo‘ladi.

Qadrli do‘stlar!

Siz azizlarni yana bir bor kirib kelayotgan Yangi — 2026-yil bilan chin yurakdan muborakbod etaman. Barchangizga mustahkam sog‘liq, oilaviy baxt-saodat, tinchlik-osoyishtalik, yurtimiz ravnaqi yo‘lidagi mas’uliyatli va sharafli mehnatingizda ulkan muvaffaqiyatlar tilayman.

Yangi yilda xonadonlaringizdan quvonch, fayzu baraka arimasin, osmonimiz musaffo bo‘lsin!

2026-yil qutlug‘ va barakali kelsin!
 Yangi yilingiz muborak bo‘lsin, azizlar!