Buxoro viloyati Olot tumani hokimligi

Joriy yilning iyun oyida tuman hokimi Nargiza Nematova boshchiligidagi delegatsiya Xitoy Xalq Respublikasiga xizmat safarini amalga oshirgan edi. Safar davomida Jiangsu provinsiyasining Suzhou shahrida joylashgan “Suzhou Yaoante International Trade” Co., Ltd. kompaniyasi rahbariyati bilan uchrashuv o‘tkazilib, Olot tumanida baliqchilik sanoatini rivojlantirish bo‘yicha hamkorlik qilishga kelishib olingan.

Mazkur uchrashuv yakunida tomonlar o‘rtasida dastlabki qiymati 10 million AQSh dollari miqdoridagi xorijiy investitsiyalarni jalb etish hamda “Baliqchilik sanoat parki” loyihasini amalga oshirish to‘g‘risida kelishuvga erishilgan edi.

Bugungi kunda “Suzhou Yaoante International Trade” Co., Ltd. kompaniyasi vakillari Olot tumaniga tashrif buyurib, “FENG NIAN GUO JI” MChJ xorijiy korxonasini tashkil etishdi. Korxona tomonidan loyiha Qirlishon massivida joylashgan 100 gektar yer maydonida bosqichma-bosqich amalga oshirilmoqda.

Hudud e-auksion savdosi orqali xarid qilinib, hozirda 10 dan ortiq maxsus texnikalar yordamida baliq yetishtirish uchun mo‘ljallangan sun’iy suv havzalarini qazish hamda qurilish osti maydonlarini tayyorlash ishlari olib borilmoqda.

Bugun tuman hokimi Nargiza Nematova loyiha joyiga tashrif buyurib, amalga oshirilayotgan ishlar jarayoni bilan yaqindan tanishdi, shuningdek, investorlarning taklif va muammolarini tingladi.

Loyihaning dastlabki bosqichida 2,5 gektar maydonda inkubatsiya sexi, 50 sotix maydonda esa baliq uchun ozuqa tayyorlash sexini ishga tushirish rejalashtirilgan. Keyingi bosqichlarda 1 gektardan 30 ta sun’iy ko‘l va hovuz, shuningdek, 1 gektardan 20 ta yopiq sun’iy hovuz kichik baliqlar yetishtirish uchun tashkil etiladi. Uchinchi bosqichda esa 20 gektar suv havzalarda krevetka yetishtirish, 10 gektar sun’iy hovuzlarda intensiv usulda sudak baliqini parvarishlash ko‘zda tutilgan.

Loyiha to‘liq ishga tushgach, 40 dan ortiq yangi ish o‘rinlari yaratiladi. Shuningdek, mahalliy aholiga baliq mahsulotlarini yetishtirish, baliq ozuqasi ishlab chiqarish, naslchilikni rivojlantirish hamda yangi eksport yo‘nalishlarini ochish bo‘yicha keng imkoniyatlar yaratiladi.