“ACWA Power” kompaniyasi rahbari bilan hamkorlik masalalari yuzasidan fikr almashildi

Uchrashuvda “Vision Invest” kompaniyasining prezidenti va ijrochi direktori Omar al Midani hamda O‘zbekiston Respublikasi Iqtisodiyot va moliya vaziri o‘rinbosari Ilhomjon Umrzakov va boshqa mas’ul vakillar ishtirok etdi.  

Muloqot davomida tomonlar o‘zaro manfaatli hamkorlik aloqalarini yanada rivojlantirish, birgalikda amalga oshirilayotgan loyihalar va ularning natijalari, hamkorlikni yangi yo‘nalishlar bilan boyitish hamda qo‘shma loyihalar ko‘lamini kengaytirish yuzasidan muhokamalar olib bordi.  

Xususan, muhokamalarda tomonlar davlat-xususiy sheriklik asosida amalga oshirilayotgan loyihalar, jumladan, sog‘liqni saqlash – Farg‘onada ko‘p tarmoqli shifoxona barpo etish loyihasini samarali tashkil etish, transport sohasida infratuzilmani rivojlantirish, shu jumladan, “Yangi Toshkent” xalqaro aeroporti loyihasini muvaffaqiyatli amalga oshirish hamda yashil energiya ishlab chiqarish sohasidagi loyihalarga alohida urg‘u berildi.  

Shuningdek, uchrashuvda mamlakatimizda makroiqtisodiy rivojlanish borasida erishilayotgan natijalar, raqamli rivojlanish, kommunikatsiya va IT sohalarida yangi loyihalarni amalga oshirish yuzasidan fikr almashildi.  

Muzokaralar yakunida tomonlar o‘zaro hamkorlik aloqalarini rivojlantirish hamda samarali va manfaatli loyihalar ko‘lamini kengaytirishga kelishib oldi.