O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Ushbu vaqtinchalik Nizom O'zbekiston Respublikasi Iqtisodiyot va moliya vazirligi huzuridagi G'aznachilik xizmati qo'mitasi (keyingi o'rinlarda – G'aznachilik) maqomi, asosiy vazifalari, funktsiyalari, majburiyatlari, faoliyatini tashkil etish tartibi va hisobotini, shuningdek, G'aznachilik rahbarlarining funktsional majburiyatlari va javobgarliklarini belgilaydi.
G'aznachilik O'zbekiston Respublikasi budjet tizimi budjetlari g'azna ijrosini amalga oshirish sohasida respublika ijro etuvchi hokimiyat organi hisoblanadi.
G'aznachilik O'zbekiston Respublikasi Iqtisodiyot va moliya vazirligiga (keyingi o'rinlarda — Iqtisodiyot va moliya vazirligi) bo'ysunadi.
G'aznachilik o'z faoliyatida O'zbekiston Respublikasi Konstitusiyasi va qonunlariga, O'zbekiston Respublikasi Oliy Majlisi palatalarining qarorlariga, O'zbekiston Respublikasi Prezidentining farmonlari, qarorlari va farmoyishlariga, O'zbekiston Respublikasi Vazirlar Mahkamasining qarorlari va farmoyishlariga, Iqtisodiyot va moliya vazirligining hujjatlariga, shuningdek, ushbu vaqtinchalik Nizomga va boshqa Qonunchilik hujjatlariga amal qiladi.
G'aznachilik tomonidan o'z vakolatlari doirasida qabul qilingan qarorlar davlat va xo'jalik boshqaruvi organlari, mahalliy davlat hokimiyati organlari, boshqa tashkilotlar va ularning mansabdor shaxslari, shuningdek, yuridik va jismoniy shaxslarning ijro etishi uchun majburiy hisoblanadi.

G'aznachilik, uning Qoraqalpog'iston Respublikasi, viloyatlar va Toshkent shahar boshqarmalari (keyingi o'rinlarda hududiy boshqarmalar) yuridik shaxs hisoblanadi, O'zbekiston Respublikasi Davlat gerbi tasviri tushirilgan hamda o'z nomi davlat tilida yozilgan muhrga va blankalarga, mustaqil balansga, shaxsiy g'azna hisobvaraqlariga, bank hisob raqamlariga, shu jumladan chet el valyutasidagi hisob raqamlariga ega bo'ladi.
G'aznachilik o'z faoliyatini Qonunchilik hujjatlariga muvofiq, respublika ijro etuvchi hokimiyat organlari, mahalliy davlat hokimiyati organlaridan mustaqil ravishda amalga oshiradi.
G'aznachilikning rasmiy nomi:
a) davlat tilida:
to'liq nomi – O'zbekiston Respublikasi Iqtisodiyot va moliya vazirligi huzuridagi G'aznachilik xizmati qo'mitasi, 

qisqartmasi – G'aznachilik;

b) rus tilida:
to'liq nomi – Комитет казначейской службы при Министерстве экономики и финансов Республики Узбекистан,

qisqartmasi – Казначейство;

v) ingliz tilida:
to'liq nomi – Treasury Service Committee under the Ministry of Economy and Finance of the Republic of Uzbekistan, 

qisqartmasi – Treasury.

G'aznachilikning joylashgan joyi (pochta manzili): Toshkent shahri, Niyozbek yo'li ko'chasi, 1 uy, 100035.