Özbekiston Respublikasi Iqtisodiyot vа Moliya vazirligi huzuridagi Ğaznaçilik xizmati qömitasi

Mamlakatimizda aholi, ayniqsa, yoshlar o‘rtasida kitobxonlik madaniyatini yuksaltirish, mutolaaga bo‘lgan qiziqishni oshirish, kitobning inson ma’naviy kamoloti va intellektual salohiyatini rivojlantirishdagi o‘rnini keng targ‘ib qilishga alohida e’tibor qaratilmoqda.

Xususan, O‘zbekiston Respublikasi Prezidentining 2026-yil 15-yanvardagi PQ–9-sonli «Kitobxonlik madaniyatini rivojlantirish va aholi o‘rtasida kitob o‘qishga qiziqishni oshirish chora-tadbirlari to‘g‘risida»gi qarorida ushbu yo‘nalishdagi ishlarni yangi bosqichga olib chiqish, aholining, ayniqsa, yoshlarning kitob mutolaasiga bo‘lgan qiziqishini oshirish hamda tashkilot va muassasalarda kitobxonlik muhitini shakllantirish bo‘yicha muhim vazifalar belgilab berilgan.

Mazkur qaror ijrosini ta’minlash, belgilangan vazifalarning amaldagi holatini o‘rganish hamda mas’ul tashkilotlar faoliyatini baholash maqsadida Kitobxonlik madaniyatini rivojlantirish jamg‘armasi Vasiylik kengashining tegishli qarori asosida vazirlik va idoralarda o‘rganish ishlari tashkil etilmoqda.

Navbatdagi o‘rganish tadbiri doirasida Adliya vazirining ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Sh. Sagatova O‘zbekiston Respublikasi G‘aznachilik qo‘mitasiga tashrif buyurdi.

Tashrif davomida G‘aznachilik qo‘mitasida kitobxonlik madaniyatini rivojlantirish, xodimlar o‘rtasida kitob mutolaasiga bo‘lgan qiziqishni oshirish, mutolaa uchun qulay muhit yaratish, kitobxonlikni kundalik hayot va mehnat faoliyatining ajralmas qismiga aylantirish borasida amalga oshirilayotgan ishlar bilan atroflicha tanishildi.

Jumladan, tashkilotda mazkur yo‘nalishda belgilangan vazifalarning ijrosi, kitobxonlikni targ‘ib qilishga qaratilgan tashkiliy chora-tadbirlar, xodimlarning mutolaaga jalb etilganlik darajasi hamda kitobxonlik muhitini shakllantirish borasidagi ishlar o‘rganish jarayonida e’tibor markazida bo‘ldi.

Xususan, qo‘mitada tashkil etilgan kutubxona jamoada kitobxonlik madaniyatini rivojlantirish, xodimlarning intellektual salohiyatini oshirish, ma’naviy dunyoqarashini boyitish hamda yosh avlod qalbida kitobga muhabbat uyg‘otishga xizmat qilmoqda. Kutubxona xodimlarning bo‘sh vaqtlarini mazmunli tashkil etish, mutolaa madaniyatini keng targ‘ib qilish va ma’rifatga intiluvchi jamoani shakllantirish yo‘lidagi muhim qadam sifatida e’tirof etilmoqda.

Kutubxona faoliyatini raqamlashtirish va xodimlar uchun yanada qulay sharoitlar yaratish maqsadida maxsus Telegram-bot — @gazna_kutubxonasi_bot joriy etilgan. Mazkur bot orqali xodimlar kutubxona fondidagi mavjud kitoblar ro‘yxati bilan tanishish, kerakli adabiyotlarni izlash, shuningdek, kitoblarni olish va qaytarish jarayonlarini elektron tarzda rasmiylashtirish imkoniyatiga ega. Bu esa kutubxona fondidan samarali foydalanish, kitoblar harakatining hisobini yuritish hamda kutubxona xizmatlari sifatini oshirishga xizmat qilmoqda.

Sh. Sagatova kutubxona faoliyatini raqamlashtirish borasida yo‘lga qo‘yilgan ushbu tajribani ijobiy baholab, boshqa vazirlik va idoralarda ham shunday Telegram-bot yaratish va undan foydalanishni tavsiya qildi. Qo‘mitada amalga oshirilgan ishlar bilan yaqindan tanishgan Sh. Sagatova mazkur Telegram-botni «vijdon amri bilan ishlaydigan bot» deya ta’riflab, uning ochiq kutubxona tamoyili asosida, kitobxonlarning halolligi va mas’uliyatiga tayangan holda faoliyat yuritishini e’tirof etdi. Mazkur yondashuv kitobxonlikni ommalashtirish, xodimlar uchun kutubxona xizmatlaridan foydalanishni qulaylashtirish hamda kitoblar hisobini tizimli yuritishga xizmat qilishi ta’kidlandi.

Kitob inson tafakkurini yuksaltiruvchi, ma’naviyatini boyituvchi va kelajakka yo‘l ko‘rsatuvchi bebaho manbadir. Kutubxona fondiga qo‘shilayotgan har bir kitob nafaqat fondning boyishiga, balki jamoada kitobxonlik muhitining yanada mustahkamlanishiga ham munosib hissa bo‘lmoqda.

Kelgusida kutubxona fondini yangi adabiyotlar bilan boyitish, kitob taqdimotlari, mutolaa tadbirlari va ma’naviy-ma’rifiy uchrashuvlarni muntazam tashkil etish rejalashtirilgan. Shuningdek, qo‘mita tarkibiy bo‘linmalarida «Kitob burchaklari»ni tashkil etish, xodimlar uchun har oyda «Kitob o‘qish soati»ni yo‘lga qo‘yish, kitobxonlikni yanada rag‘batlantirish maqsadida ichki reyting tizimini joriy etish hamda tanlov asosida eng ko‘p kitob mutolaa qilgan xodimlarni moddiy rag‘batlantirib borish ko‘zda tutilgan. Mazkur chora-tadbirlar jamoada kitobxonlik madaniyatini yuksaltirish, mutolaa muhitini mustahkamlash va xodimlarning intellektual salohiyatini yanada oshirishga xizmat qiladi.

Shuningdek, Vasiylik kengashining 2026-yil 10-sentabrdagi 5-son bayoniga ilova qilingan o‘rganish savolnomasi va ma’lumotnoma shakllari asosida belgilangan tartibda o‘rganish ishlari amalga oshirildi. Mas’ul vakil tomonidan tegishli savolnomalar to‘ldirilib, belgilangan mezonlar asosida G‘aznachilik qo‘mitasida amalga oshirilayotgan ishlar baholandi.

O‘rganish natijalariga ko‘ra, G‘aznachilik qo‘mitasida kitobxonlik madaniyatini rivojlantirish, xodimlarning ma’naviy-ma’rifiy dunyoqarashini kengaytirish va kitob mutolaasiga bo‘lgan qiziqishini oshirish yo‘nalishidagi ishlar ijobiy baholandi hamda qo‘mita faoliyatiga yuqori baho berildi.

Ushbu yuqori baho G‘aznachilik qo‘mitasida ma’naviy-ma’rifiy ishlarni tizimli tashkil etish, kitobxonlik madaniyatini rivojlantirish va xodimlarning intellektual salohiyatini yuksaltirishga qaratilayotgan e’tiborning ijobiy natijasi sifatida e’tirof etiladi.

Ta’kidlash joizki, kitobxonlik nafaqat insonning bilim va tafakkurini boyitadi, balki uning kasbiy salohiyati, mustaqil fikrlashi, tahliliy yondashuvi va dunyoqarashini ham rivojlantiradi. Shu bois G‘aznachilik qo‘mitasida ushbu yo‘nalishdagi ishlarni izchil davom ettirish, xodimlar o‘rtasida mutolaa madaniyatini yanada keng ommalashtirish hamda kitobxonlik muhitini mustahkamlashga alohida ahamiyat qaratiladi.

G‘aznachilik qo‘mitasi — bilimli, ma’naviyatli va yuksak intellektual salohiyatga ega kadrlar jamoasini shakllantirish yo‘lida izchil faoliyat olib bormoqda.