Özbekiston Respublikasi Iqtisodiyot vа Moliya vazirligi huzuridagi Ğaznaçilik xizmati qömitasi

Yig‘ilishda davlat fuqarolik xizmatchilarining odob-axloq qoidalariga rioya etishi, xizmat kiyinish madaniyatini yuksaltirish, jamoada sog‘lom ma’naviy-ruhiy muhitni mustahkamlash hamda xotin-qizlarning davlat va jamiyat hayotidagi faolligini oshirish masalalari muhokama qilindi.

Yig‘ilishni G‘aznachilik xizmati qo‘mitasi raisining ma’naviyat va davlat tili masalalari bo‘yicha maslahatchisi O.Kajanova kirish so‘zi bilan ochib berdi.

O‘z nutqida Rais maslahatchisi davlat xizmatida yuksak ma’naviyat, kasbiy mas’uliyat, halollik va odob-axloq tamoyillariga amal qilish, xodimlarning muomala hamda kiyinish madaniyatini oshirish davlat organlari nufuzini mustahkamlashning muhim omili ekanini ta’kidladi. Davlat xizmatchisining kasbiy bilim va malakasi bilan bir qatorda, uning shaxsiy namunasi, xizmat intizomi va fuqarolar bilan munosabatdagi madaniyati ham davlat idoralariga bo‘lgan ishonchni oshirishda alohida ahamiyat kasb etishi qayd etildi.

Shuningdek, mamlakatimizda xotin-qizlarning huquq va manfaatlarini ta’minlash, ularning davlat boshqaruvi, iqtisodiyot, ta’lim va ilm-fan sohalaridagi ishtirokini kengaytirish borasida amalga oshirilayotgan islohotlarga alohida e’tibor qaratildi.

Xususan, yig‘ilishda keltirilgan ma’lumotlarga ko‘ra, siyosiy partiyalarda xotin-qizlarning ulushi qariyb 49 foizni, davlat boshqaruvida 35 foizni, Oliy Majlis Qonunchilik palatasida 38 foizni, Senatda 27 foizni, mahalliy Kengashlarda 25 foizni, vazir va unga tenglashtirilgan lavozimlarda esa 5,7 foizni tashkil etayotgani bildirildi.

Iqtisodiy sohada tadbirkorlik subyektlari orasida xotin-qizlarning ulushi 35–37 foiz atrofida ekani, iqtisodiy faol xotin-qizlar soni 2026-yilda 6 million 970 ming nafarni tashkil etishi va 2030-yilga borib 7 million 300 ming nafarga yetishi prognoz qilinayotgani qayd etildi. Shuningdek, oliy ta’lim tizimidagi professor-o‘qituvchilar va ilmiy izlanuvchilar orasida xotin-qizlarning ulushi 40 foiz ekani ta’kidlandi.

O. Kajanova ushbu ko‘rsatkichlar xotin-qizlarning jamiyat taraqqiyotidagi o‘rni va salohiyatini namoyon etishini, ularning kasbiy rivojlanishini qo‘llab-quvvatlash, rahbarlik lavozimlaridagi ishtirokini kengaytirish hamda tashabbuskorligini rag‘batlantirish muhim vazifalardan ekanini qayd etdi.

Yig‘ilish davomida Qo‘mitaning xotin-qizlar masalalari bo‘yicha mas’ul xodimi G. Yusupalixodjayeva xotin-qizlarning davlat xizmatidagi faolligini oshirish, ularning kasbiy salohiyatini rivojlantirish, huquq va qonuniy manfaatlarini himoya qilish hamda jamoada o‘zaro hurmat va hamjihatlik muhitini mustahkamlash masalalariga to‘xtalib o‘tdi.

Qo‘mitaning bosh yuriskonsulti Nodir Teshayev O‘zbekiston Respublikasi Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari mazmun-mohiyati yuzasidan tushuntirishlar berdi. So‘ngra Qo‘mitaning inson kapitalini rivojlantirish bo‘yicha bosh mutaxassisi Akmal Xoliqov esa davlat xizmatchilarining kiyinish madaniyati, ichki mehnat tartibi va kasbiy odob-axloq talablariga rioya etish masalalari haqida batafsil tushuntirish berib o‘tdi.

Shuningdek, G‘aznachilikning Korrupsiyaga qarshi kurashish va komplayens nazorati boʻlimi boshligʻi Sh.Ablayarov o‘z nutqida davlat xizmatchilarining xizmat faoliyatida va xizmatdan tashqari vaqtda qonuniylik, halollik, xolislik, adolatlilik va mas’uliyat tamoyillariga rioya etishi, manfaatlar to‘qnashuvining oldini olishi, fuqarolar va hamkasblar bilan muloqotda yuksak muomala madaniyatini namoyon etishi zarurligini  ta’kidladi. Shuningdek, Odob-axloq komissiyasining tegishli qoidalarga rioya etilishini ta’minlashdagi vazifalari, chora-tadbirlariga e’tibor qaratish muhim ekanligini aytib o‘tdi.

Ta’kidlanganidek, davlat xizmatchisining tashqi ko‘rinishi ishchanlik muhiti talablariga mos bo‘lishi, kiyinishda ozodalik, saranjomlik va rasmiylik tamoyillariga amal qilinishi tashkilotning ijobiy qiyofasini shakllantirishda muhim o‘rin tutadi.

Yig‘ilish yakunida davlat xizmatchilarining kasbiy mas’uliyatini oshirish, odob-axloq va xizmat kiyinish madaniyatiga rioya etish, jamoada sog‘lom ma’naviy muhitni mustahkamlash hamda xotin-qizlarning kasbiy va ijtimoiy faolligini qo‘llab-quvvatlash masalalariga doimiy e’tibor qaratish zarurligi ta’kidlandi.

Odob-axloq komissiyasining navbatdagi yig‘ilishi G‘aznachilik xizmati qo‘mitasida xizmat intizomini mustahkamlash, xodimlarning kasbiy va ma’naviy salohiyatini yuksaltirish hamda davlat xizmatining nufuzini oshirishga xizmat qiladi.