G‘aznachilik xizmati qo‘mitasida “Umummilliy diktant” ma’rifiy tadbiri o‘tkazildi
2026-10-14 00:00:00 / Yangiliklar
Mazkur tadbir orqali o‘zbek tiliga davlat tili maqomi berilganining 37 yilligini munosib nishonlash, davlat tilining nufuzini oshirish, xodimlarning davlat tilida ish yuritish ko‘nikmalari va yozma savodxonlik darajasini baholash, shuningdek, fikrni aniq, izchil va savodli ifodalash malakasini mustahkamlash ko‘zda tutilgan. Sinov natijalari asosida aniqlangan kamchiliklarni bartaraf etish va yozma savodxonlikni yanada oshirishga qaratilgan takliflar ishlab chiqiladi.
Tadbir davomida ona tilimizning milliy o‘zligimiz, ma’naviy qadriyatlarimiz va davlat boshqaruvi tizimidagi o‘rni alohida ta’kidlandi. Shuningdek, davlat organlarida rasmiy hujjatlarni adabiy til me’yorlariga muvofiq yuritish, imlo va tinish belgilariga rioya qilish, xodimlarning nutq hamda yozma savodxonlik madaniyatini yuksaltirish muhim ahamiyat kasb etishi qayd etildi.
Tadbirda O‘zbekiston davlat jahon tillari universiteti akademik litseyining ona tili va adabiyot fani yetakchi o‘qituvchisi D. Mahmudova ishtirok etib, o‘zbek tilining imlo me’yorlari, yozma nutq madaniyati hamda tinish belgilaridan to‘g‘ri foydalanish masalalari bo‘yicha keng to‘xtaldi. Shuningdek, diktant yozish jarayonida rioya etilishi lozim bo‘lgan qoidalarni batafsil tushuntirib, matn mazmunini to‘g‘ri anglash, so‘zlarni imlo me’yorlariga muvofiq yozish, gap qurilishida tinish belgilarini o‘rinli qo‘llashning ahamiyatiga alohida e’tibor qaratdi.
“Umummilliy diktant” doirasida Qo‘mita xodimlari o‘zbek tilining imlo qoidalari, tinish belgilaridan to‘g‘ri foydalanish hamda yozma nutq madaniyati bo‘yicha bilim va ko‘nikmalarini sinovdan o‘tkazdilar.
Diktant natijalari asosida xodimlarning yozma savodxonlik darajasini tahlil qilish, davlat tilida ish yuritish sifatini oshirish bo‘yicha takliflar ishlab chiqish hamda yuqori natija ko‘rsatgan xodimlarni “Eng savodxon xodim” nominatsiyasi bo‘yicha taqdirlash nazarda tutilgan.
Ta’kidlash joizki, davlat tiliga hurmat, avvalo, uning kundalik faoliyatda, xususan, rasmiy yozishmalar va xizmat hujjatlarida to‘g‘ri qo‘llanilishida namoyon bo‘ladi.