O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Joriy yilning 25-avgust kuni Oʻzbekiston Respublikasi Davlat mustaqilligining 35 yilligi munosabati bilan Gʻaznachilik xizmati qoʻmitasida maʼnaviy-maʼrifiy tadbir  tashkil etildi.

Mustaqillikning 35 yilligiga bagʻishlangan tadbir “Yagona Vatan, yagona xalq boʻlib, yangi hayot va kelajak yaratamiz!” degan ezgu shior ostida oʻtkazildi. Ushbu shior tadbirning umumiy ruhini belgilab, Vatan, birlik, tarixiy xotira va kelajak uchun masʼuliyat kabi tushunchalarni yagona gʻoya atrofida birlashtirdi.

Tadbirni ochib berish uchun Gʻaznachilik xizmati qoʻmitasi raisi  A. Xaydarovning kirish soʻzi tinglandi. Oʻz soʻzida qoʻmita raisi mustaqillik xalqimiz hayotidagi eng ulugʻ va tarixiy ahamiyatga ega voqealardan biri ekanini taʼkidlab, istiqlol yillarida yurtimizda amalga oshirilgan keng koʻlamli iqtisodiy islohotlar, yaratilgan imkoniyatlar va erishilgan yutuqlar xususida fikr bildirdi. Shu bilan birga, yurt taraqqiyoti va xalq farovonligini taʼminlashdek ezgu maqsadlarga erishishda har bir fuqaroning oʻz vazifasiga masʼuliyat va fidoyilik bilan yondashishi, mamlakat ravnaqiga munosib hissa qoʻshishi muhim ekanini taʼkidladi. Zero, Vatan taraqqiyoti nafaqat katta islohotlar, balki har bir insonning halol mehnati, tashabbusi va oʻz kasbiga sadoqati bilan bunyod etiladi. Qoʻmita raisi soʻzining yakunida barchani ulugʻ va qutlugʻ sana — Oʻzbekiston Respublikasi Davlat mustaqilligining 35 yilligi bilan samimiy muborakbod etib, yurtimizda tinchlik va osoyishtalik, xalqimiz xonadoniga fayzu baraka, mamlakatimiz taraqqiyoti va farovonligi yoʻlidagi ezgu ishlar bardavom boʻlishini tiladi.

Tadbirning dastlabki va taʼsirchan qismlaridan biri xodimlar ijrosidagi “Sharafli yoʻl: buyuk siymolar” mavzusidagi sahna koʻrinishi boʻldi. Unda tarixiy shaxslar obrazi, ularning orzu-armonlari va millat taqdiri bilan bogʻliq ezgu maqsadlar  namoyish etildii. Shu maʼnoda mazkur sahna koʻrinishi tomoshabinni shunchaki tarix sahifalariga emas, balki ajdodlarimiz orzu qilgan ozod va obod Vatan tushunchasi haqida mushohada qilishga chorladi.

Navbatdagi “Shukrona” sahna koʻrinishi esa bugungi osuda hayot, tinchlik va farovonlikning qadrini his etish gʻoyasini tarannum etdi. Shukr — xalqimiz maʼnaviyatiga singib ketgan ulugʻ fazilat. Tinch osmon, dasturxondagi non, oila bagʻridagi xotirjamlik — bularning barchasi inson qalbida shukronalik tuygʻusini uygʻotadi.

Tadbirning madaniy qismida “Bulbulcha” xor va raqs guruhining chiqishi alohida oʻrin egalladi. Shuningdek, Oʻzbekiston davlat filarmoniyasi xonanda va raqqosalari ham oʻz sanʼat namunalari bilan tadbirga koʻtarinki ruh bagʻishladi.

Tadbir doirasida ijod ahli va adabiyot vakillari bilan muloqotlar ham tashkil etildi. Dasturga koʻra, falsafa fanlari doktori, professor, Oʻzbekiston Yozuvchilar uyushmasi aʼzosi, shoira Sayyora Toʻychiyeva ishtirokidagi suhbat tadbirning maʼnaviy-maʼrifiy ahamiyatini yanada oshirdi. Zero, iqtisodiy taraqqiyot va maʼnaviy yuksalish bir-birini toʻldirgandagina jamiyat barqaror rivojlanadi. Insonning dunyoqarashi, kitobxonligi, tarixiy xotirasi va milliy oʻzligini anglashi uning kasbiy faoliyatiga ham oʻz taʼsirini koʻrsatadi.

Tadbirda “Oʻzbekiston” jurnali tahririyati vakillarining ishtiroki ham ana shu maʼnaviy-maʼrifiy yoʻnalishning uzviy davomi boʻldi.Tahririyat xodimlari tomonodan qiziqarli savol-javoblar uyushtirildi.

Tadbirda yangragan qoʻshiqlar, sahnada gavdalangan tarixiy obrazlar, adabiyot va sanʼat vakillarining fikrlari bir haqiqatni yana bir bor eslatdi: Vatanning buyukligi uning tarixidagina emas, balki shu tarixni davom ettirib, yangi kelajak yaratayotgan avlod qoʻlidadir.

Shu maʼnoda, istiqlolning 35 yilligi — nafaqat shonli oʻtmishga nazar, balki kelajakka dadil qadam tashlash, birdamlik va shukronalik tuygʻularini yanada mustahkamlash davridir.