Bilim va hamjihatlik uyg‘unligi: G‘aznachilik jamoasi “Zakovat”da faxrli 3-o‘rinni qo‘lga kiritdi

O‘zbekiston Respublikasi davlat mustaqilligining 35 yilligi munosabati bilan davlat fuqarolik xizmatchilari o‘rtasida o‘tkazilgan “Zakovat” intellektual o‘yini bilim, tafakkur va jamoaviy hamkorlikni namoyon etgan nufuzli bellashuvlardan biri bo‘ldi.

Mazkur musobaqada Toshkent shahridagi 38 ta davlat tashkiloti jamoasi o‘zaro kuch sinashib, mantiqiy fikrlash, tezkor qaror qabul qilish hamda jamoaviy hamjihatlik borasidagi salohiyatini namoyish etdi. Qizg‘in va murosasiz kechgan bahslarda har bir jamoa g‘alaba uchun qat’iyat bilan kurash olib bordi.

Bellashuvda Toshkent shahar G‘aznachilik xizmati boshqarmasi nomidan 6 nafar xodimdan iborat jamoa ham faol ishtirok etdi. Jamoa har bir savolga puxta tayyorgarlik, teran mushohada va o‘zaro hamjihatlik asosida yondashib, yuqori natijalarni qayd etdi.

Yakuniy natijalarga ko‘ra, Toshkent shahar G‘aznachilik xizmati boshqarmasi jamoasi kuchli raqobat sharoitida munosib ishtirok etib, faxrli 3-o‘rinni egalladi. Ushbu yutuq jamoa a’zolarining keng dunyoqarashi, yuksak intellektual salohiyati, tezkor fikrlashi va bir yoqadan bosh chiqarib harakat qilganining yorqin ifodasi bo‘ldi.

“Zakovat” intellektual o‘yinlari, nafaqat, bilimlar bellashuvi, balki davlat fuqarolik xizmatchilari o‘rtasida muloqot, tajriba almashish, sog‘lom raqobat muhitini rivojlantirish hamda kitobxonlik va tafakkur madaniyatini yanada yuksaltirishga xizmat qiladigan muhim maydondir.

Toshkent shahar G‘aznachilik xizmati boshqarmasi jamoasini ushbu munosib yutuq bilan samimiy tabriklaymiz. Kelgusida ham ular intellektual musobaqalarda yangi marralarni zabt etib, yurtimiz ravnaqi yo‘lida o‘z bilim va salohiyatini namoyon etishiga ishonamiz.