O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Yurtimizda mehnat faxriylarini e’zozlash, ularning ko‘p yillik samarali faoliyati, boy hayotiy tajribasi hamda jamiyat taraqqiyotiga qo‘shgan munosib hissasini e’tirof etish davlat siyosatining ustuvor yo‘nalishlaridan biri hisoblanadi. Ayniqsa, fidoyi mehnati, yuksak kasbiy mahorati va yosh avlod tarbiyasiga qo‘shayotgan hissasi bilan o‘rnak bo‘layotgan faxriylarni rag‘batlantirish ezgu qadriyatlarimizning yorqin ifodasidir.

Shu munosabat bilan Toshkent shahridagi O‘zbekiston kasaba uyushmalari saroyida O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi Vasiylik kengashi qaroriga muvofiq “Mehnat faxriysi – 2026” ko‘krak nishonini tantanali topshirish marosimi bo‘lib o‘tdi. Tadbirda yurt ravnaqi va jamiyat taraqqiyoti yo‘lida uzoq yillar samarali mehnat qilgan, bugungi kunda ham jamoatchilik hayoti, ma’naviy-ma’rifiy ishlar hamda yoshlarni vatanparvarlik ruhida tarbiyalashda faol ishtirok etayotgan bir guruh nuroniylar va mehnat faxriylari munosib taqdirlandi.

Quvonarlisi, mazkur yuksak e’tirofga O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasi Moliyaviy majburiyatlar ijrosi boshqarmasi Huquqni muhofaza qiluvchi organlarga qarashli tashkilotlarga xizmat ko‘rsatish bo‘limi bosh mutaxassisi Hasanov Rinnat Shamilovich ham sazovor bo‘ldi.

Hasanov Rinnat Shamilovich ko‘p yillar davomida G‘aznachilik tizimida sidqidildan mehnat qilib, o‘zining halolligi, mas’uliyati, kasbiy salohiyati va fidoyiligi bilan jamoada alohida hurmat qozongan. U davlat moliyaviy majburiyatlarining o‘z vaqtida va sifatli ijro etilishini ta’minlash, xizmat ko‘rsatilayotgan tashkilotlar bilan samarali hamkorlikni yo‘lga qo‘yish hamda G‘aznachilik tizimi faoliyatini takomillashtirishga munosib hissa qo‘shib kelmoqda.

Shuningdek, uning ko‘p yillik amaliy tajribasi, yosh mutaxassislarga ustozlik qilishi, kasbiy bilim va ko‘nikmalarini ulashishi, mehnat intizomi hamda xizmat burchiga sadoqati jamoa orasida yuksak qadrlanadi. U o‘zining samarali faoliyati bilan nafaqat tizim rivojiga, balki davlat moliyasi boshqaruvining yanada takomillashishiga ham munosib hissa qo‘shib kelayotgan tajribali mutaxassislardan biridir.

“Mehnat faxriysi – 2026” ko‘krak nishoni Hasanov Rinnat Shamilovichning ko‘p yillik fidokorona mehnati, kasbiga bo‘lgan sadoqati va G‘aznachilik tizimi rivojiga qo‘shgan xizmatlarining yuksak e’tirofi bo‘ldi.

O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasi jamoasi Hasanov Rinnat Shamilovichni ushbu nufuzli mukofot bilan samimiy muborakbod etadi hamda unga mustahkam sog‘lik, oilaviy farovonlik va kelgusidagi faoliyatida yangi muvaffaqiyatlar tilaydi.