O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Iqtisodiyot va moliya vazirligi huzuridagi G‘aznachilik xizmati qo‘mitasida sportni ommalashtirish va sog‘lom turmush tarzini targ‘ib qilish masalalariga alohida e’tibor qaratilmoqda. Xodimlarning jismoniy faolligini oshirish, salomatligini mustahkamlash hamda sog‘lom va samarali mehnat muhitini yaratish qo‘mita faoliyatining muhim yo‘nalishlaridan biri hisoblanadi.

O‘zbekiston Respublikasi Prezidenti Shavkat Mirziyoyev boshchiligida 2026-yil 7-aprel kuni sport sohasini yangi bosqichga olib chiqish masalalariga bag‘ishlab o‘tkazilgan videoselektor yig‘ilishining 25-son bayoni 21-bandida barcha vazirlik va idoralar, davlat tashkilotlari, shuningdek viloyat, tuman va shahar hokimliklari tizimida haftaning bir kunini “Sport kuni” sifatida belgilash vazifasi yuklatilgan.

Mazkur topshiriq ijrosini ta’minlash maqsadida Iqtisodiyot va moliya vazirligi huzuridagi G‘aznachilik xizmati qo‘mitasi tomonidan tegishli nazorat-reja ishlab chiqilib, haftaning payshanba kuni “Sport kuni” etib belgilandi. Ushbu tashabbus doirasida xodimlarni sportga keng jalb etish, jamoada sog‘lom turmush tarzini qaror toptirish hamda sport madaniyatini rivojlantirishga qaratilgan qator tadbirlar muntazam ravishda tashkil etib kelinmoqda.

Bugungi kunda qo‘mita xodimlari jismoniy faollikni oshirish, sog‘lom turmush tarzini keng targ‘ib qilish va jamoaviy hamjihatlikni mustahkamlash maqsadida sport tadbirlarida xodimlari faol qatnashib, o‘zlarining sportga bo‘lgan qiziqishi hamda intilishini namoyon etmoqda.

Sport tadbirlari xodimlarning salomatligini mustahkamlash, ish unumdorligini oshirish, jamoada sog‘lom muhitni shakllantirish va korporativ madaniyatni rivojlantirishda muhim omil bo‘lib xizmat qilmoqda.

Kelgusida ham G‘aznachilik xizmati qo‘mitasida sportni ommalashtirish, xodimlarni sport va sog‘lom turmush tarziga keng jalb etish, sport-sog‘lomlashtirish tadbirlarini yanada takomillashtirish borasidagi ishlar izchil davom ettiriladi. Sport bilan muntazam shug‘ullanish orqali nafaqat jismoniy sog‘lomlik, balki yuksak kayfiyat, mustahkam iroda va samarali mehnat muhiti ta’minlanishi alohida ahamiyat kasb etadi.

Sog‘lom turmush tarzi va sportga bo‘lgan e’tibor — sog‘lom jamoa, yuqori natijadorlik hamda taraqqiyotning muhim omillaridan biridir.