O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

2026-yil 12-may kuni O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida Jahon banki va Xalqaro valyuta jamg‘armasi missiyasi a’zolari ishtirokida uchrashuv bo‘lib o‘tdi.

Uchrashuvda O‘zbekiston Respublikasi Iqtisodiyot va moliya vazirligi departamentlari rahbarlari, G‘aznachilik xizmati qo‘mitasi raisi A. Xaydarov, rais o‘rinbosari N. Juraev, “Axborot texnologiyalari markazi” DUK direktori F. Xudamkulov, G‘aznachilik tizimi boshqarma boshliqlari hamda boshqa mas’ul xodimlar ishtirok etdi.

Jahon banki va Xalqaro valyuta jamg‘armasi missiyasi tomonidan esa katta xususiy sektor mutaxassisi Erali Beksultan, davlat moliyasini boshqarish bo‘yicha yetakchi mutaxassis Arman Vatyan, davlat moliyasini boshqarish bo‘yicha katta mutaxassis Garik Sergeyan, davlat moliyasini boshqarish bo‘yicha mutaxassis Nurgul Tattibekova, davlat moliyasini boshqarish bo‘yicha xalqaro maslahatchi Vardan Aramyan, davlat moliyasini boshqarish bo‘yicha xalqaro maslahatchi Ruslana Rudnitska, davlat moliyasini boshqarish bo‘yicha maslahatchi Firuza Sayfullayeva, maslahatchi Anna Ubaydullayeva hamda dasturlar bo‘yicha assistent Luiza Alimova ishtirok etdi.

Tomonlar tomonidan davlat moliyasini boshqarish tizimini modernizatsiya qilish, g‘aznachilik faoliyatini takomillashtirish hamda sohani raqamlashtirish yo‘nalishida amalga oshirilayotgan islohotlar muhokama qilindi. Shu bilan birga, Jahon banki tomonidan ko‘rsatilayotgan doimiy amaliy va texnik ko‘mak alohida e’tirof etildi.

Uchrashuv davomida G‘aznachilikning likvidlikni boshqarish va prognozlash salohiyatini oshirish masalalariga alohida e’tibor qaratildi. Xususan, Xalqaro valyuta jamg‘armasi bilan hamkorlikda tashkil etilgan o‘quv-amaliy seminar natijalari, zamonaviy prognozlash mexanizmlari va xalqaro tajriba yuzasidan fikr almashildi.

Shuningdek, Yagona g‘azna hisobvarag‘idagi bo‘sh mablag‘larni boshqarishda yangi moliyaviy instrumentlardan foydalanish imkoniyatlari ko‘rib chiqildi hamda ularni bosqichma-bosqich joriy etish bo‘yicha ishlab chiqilgan chora-tadbirlar rejasi muhokama qilindi.

Bundan tashqari, Yagona g‘azna hisobvarag‘i qamrovini kengaytirish, budjet tashkilotlari va boshqa davlat moliyaviy resurslarini mazkur tizim doirasida yanada to‘liq qamrab olish bo‘yicha istiqboldagi hamkorlik yo‘nalishlari belgilab olindi.

Uchrashuv yakunida tomonlar davlat moliyasini boshqarish samaradorligini oshirish va g‘aznachilik tizimini yanada rivojlantirish borasidagi hamkorlikni izchil davom ettirishga tayyor ekanliklarini ta’kidladilar.