O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Davlat xizmatchilari orasida kitobxonlik madaniyatini oshirish, milliy tariximiz va boy ma’naviy merosimizni chuqur o‘rganishga bo‘lgan qiziqishni kuchaytirish maqsadida tashkil etilgan “Temur tuzuklari” asari asosidagi viktorina tanlovi doirasida Iqtisodiyot va moliya vazirligi huzuridagi G‘aznachilik xizmati qo‘mitasida tantanali taqdirlash marosimi bo‘lib o‘tdi.

Mazkur tadbirda Iqtisodiyot va moliya vazirligi va G‘aznachilik xizmati qo‘mitasi mas’ul xodimlari ishtirok etdi.

Tadbirni vazirning ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash bo‘yicha maslahatchisi Maxmudov Obiddin Abbasovich kirish so‘zi bilan ochib berdi. U o‘z nutqida Amir Temur hayoti va faoliyati, uning davlat boshqaruvidagi yuksak salohiyati, shuningdek, “Temur tuzuklari” asarining bugungi kunda ham dolzarb ahamiyat kasb etishi haqida qiziqarli ma’lumotlarni aytib o‘tdilar. Ayniqsa, ushbu asarni har bir davlat xizmatchisi o‘qishi zarurligi alohida ta’kidlandi.

Shuningdek, G‘aznachilik xizmati qo‘mitasi raisi  Xaydarov Abdulaziz Abdulahadovich ham so‘zga chiqib, Amir Temurning boy tarixiy merosi, uning boshqaruv tamoyillari hamda kitob mutolaasining shaxsiy va kasbiy rivojlanishdagi o‘rni haqida to‘xtalib o‘tdi. Tadbir davomida boshqa ishtirokchilar ham o‘z fikr-mulohazalari bilan o‘rtoqlashdilar.

Viktorina tanlovi natijalariga ko‘ra, barcha bosqichlarni muvaffaqiyatli bosib o‘tgan holda yuqori natija qayd etgan Karimova Ozoda Umaraliyevna tanlov g‘olibi deb topildi va tantanali ravishda taqdirlandi. G‘olibga esdalik sovg‘asi sifatida Oʻzbekiston Yozuvchilar uyushmasi aʼzosi O.Maxmudov oʻzining “Farzandnoma” asarini taqdim etdi.

Tadbir davomida G‘aznachilik qo‘mitasi raisining o‘rinbosari Jo‘rayev Numon Rustamovich tomonidan “Temur tuzuklari” asari yuzasidan ishtirokchilarga qiziqarli savol berildi. Savolga to‘g‘ri javob bergan xodimga   shaxsan kitob sovg‘a qildi. Shuningdek, Gʻaznachilikning xotin-qizlar qoʻmitasi masʼul xodimi Gulbahor Yusupalixodjayeva tomonidan ham kitob sovgʻa qilinib, bu kabi kitob tanlovlari davlat xizmatchilari uchun juda manfaatli boʻlishini alohida eʼtirof etib oʻtdi.

Mazkur tanlov davlat xizmatchilari orasida kitobxonlikni keng targ‘ib qilish, tarixiy merosimizga hurmat va e’tiborni yanada kuchaytirish, shuningdek, jamoada birdamlikni, ma’naviy-ma’rifiy muhitni mustahkamlashga xizmat qilmoqda. Ayniqsa, buyuk sarkarda va davlat arbobi Amir Temurning boy merosi, uning adolatli boshqaruv tamoyillari, kuchli davlat barpo etish yo‘lidagi strategik qarashlari bugungi kunda ham o‘z ahamiyatini yo‘qotmagan.

“Temur tuzuklari” asari orqali Amir Temurning davlatni boshqarishdagi donishmandligi, intizom, adolat va mas’uliyatga asoslangan yondashuvi, xalq manfaatlarini ustuvor qo‘ygan siyosati yoritib beriladi. Ushbu asar, nafaqat,  tarixiy manba, balki zamonaviy davlat xizmatchilari uchun ham muhim amaliy qo‘llanma bo‘lib xizmat qiladi.