O'zbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi

Ma’lumki, “Xavfli ishlab chiqarish obyektlarining sanoat xavfsizligi to‘g‘risida”gi Qonun 2006-yil 28-sentabrda qabul qilingan bo‘lib, bugungi kunda mazkur hujjatni zamon talablari asosida yangilash dolzarb masalaga aylandi. Shu munosabat bilan O‘zbekiston Respublikasi Prezidentining 2024-yil 24-dekabrdagi PF-224-son Farmoniga muvofiq, qonunning yangi tahriri ishlab chiqildi.

So‘nggi yillarda sanoat xavfsizligi sohasidagi munosabatlarda sezilarli o‘zgarishlar kuzatilmoqda. Xususan, yangi sanoat tarmoqlarining rivojlanishi, yuqori xavfli texnologiyalarning joriy etilishi, shuningdek, sodir bo‘layotgan avariya va baxtsiz hodisalar tahlili ushbu yo‘nalishdagi qonunchilikni tubdan takomillashtirish zaruratini ko‘rsatmoqda.

Qonun loyihasining asosiy yo‘nalishlari

Yangi tahrirdagi qonun loyihasi bir qator muhim yangiliklarni o‘z ichiga oladi:

🔹 Amaldagi qonunni to‘liq qayta ishlab chiqish
2006-yilda qabul qilingan qonunni zamonaviy talablar asosida to‘liq qayta ko‘rib chiqish va yangi tahrirda qabul qilish nazarda tutilmoqda.

🔹 Sanoat xavfsizligi boshqaruv tizimi auditi
Qonun loyihasida xavfli ishlab chiqarish obyektlarida sanoat xavfsizligi boshqaruv tizimini auditdan o‘tkazish mexanizmini joriy etish taklif etilmoqda. Ushbu audit orqali:

• korxonalarda xavfsizlik tizimining amaldagi talablarga muvofiqligi baholanadi;

• avariya va noxush hodisalar xavfini kamaytirishga qaratilgan chora-tadbirlar samaradorligi tahlil qilinadi;

• aniqlangan kamchiliklarni bartaraf etish bo‘yicha samarali mexanizmlar ishlab chiqiladi.

🔹 Jamoatchilik nazoratini kuchaytirish
Loyihada xavfli va potensial xavfli ishlab chiqarish obyektlarida sanoat xavfsizligi qoidalariga rioya etilishi ustidan jamoatchilik nazoratini kuchaytirish nazarda tutilgan. Bu esa ochiqlik va shaffoflikni ta’minlashga, shuningdek, fuqarolarning ushbu jarayondagi ishtirokini kengaytirishga xizmat qiladi.

Kutilayotgan natijalar

Mazkur qonun loyihasining qabul qilinishi quyidagi natijalarga erishishga xizmat qiladi:

✔️ sanoat xavfsizligi tizimini zamonaviy talablar asosida takomillashtirish
✔️ avariya va baxtsiz hodisalar xavfini kamaytirish
✔️ davlat organlari va korxonalar o‘rtasida samarali hamkorlikni kuchaytirish
✔️ jamoatchilik nazoratini kengaytirish orqali ochiqlikni ta’minlash