Qozog‘istonda 290 million kub metrdan ortiq radioaktiv chiqindilar mavjud. Bu haqda Atom energiyasi agentligi raisi o‘rinbosari Gumar Sergazin ma’lum qildi, deb xabar berdi Tengrinews.

11 noyabr kuni o‘tkazilgan majlisda radioaktiv chiqindilar bilan bog‘liq ishlarni amalga oshirish to‘g‘risidagi qonun loyihasi taqdim etildi. Muhokama davomida Sergazin dolzarb raqamlar bilan o‘rtoqlashdi.«Bugungi kunda Qozog‘iston hududida qariyb 293 million kub metr radioaktiv chiqindilar mavjud bo‘lib, shundan eng katta ulush - 290 million kub metri past faollikdagi radioaktiv chiqindilardir. 237 kub metri Semipalatinsk sinov poligoniga to‘g‘ri keladi. Bu poligondan olib tashlangan va ifloslangan tuproq. Qolgan radioaktiv chiqindilar - bu o‘rtacha, yuqori faollikdagi chiqindilar - Milliy yadro markazi, Yadro fizikasi instituti, Ulba metallurgiya zavodi, Stepnogorsk kon-kimyo kombinati korxonalaridan keladi. Oqtovda Qo‘chqor-Ota va Kimyo-gidrometallurgiya zavodi ham bor», dedi Gumar Sergazin.Qayd qilinishicha, qonun loyihasi doirasida radioaktiv chiqindilar bilan bog‘liq barcha munosabatlarni tartibga soluvchi milliy operator tashkil etiladi. «Bugun ko‘rib turibmizki, hatto dunyoda ham ko‘mish punktlari bo‘yicha amaliyot juda zaif. Bir nechta mamlakatlarda ko‘mish punktlari mavjud. Qonun loyihasida ko‘mish punktlarini tashkil etish ham nazarda tutilgan. Ular hukumat qarori bilan belgilanadi. Ularni qurish va radiatsiya xavfsizligini ta’minlash uchun milliy operator mas’ul bo‘ladi, shu jumladan kelajakda barcha radioaktiv chiqindilarni kuzatish, hisobotlarni taqdim etish, reyestrni yuritish», deb qo‘shimcha qildi Sergazin. Ma’lumot uchun, radioaktiv chiqindilar - tarkibida radioaktiv izotoplar bo‘lgan, keyinchalik foydalanishga yaroqsiz, salomatlik va atrof-muhit uchun xavfli bo‘lgan chiqindilar. Ular atom elektr stansiyalarining ishlashi, yadro yoqilg‘isini qayta ishlash, shuningdek, ilmiy, tibbiy va sanoat maqsadlarida hosil bo‘ladi.