O‘zbekiston Respublikasi Investitsiyalar, sanoat va savdo vazirligi

Joriy yilning 24-iyun kuni Mo‘g‘uliston Prezidenti Uxnaagiyn Xurelsuxning O‘zbekistonga davlat tashrifi doirasida O‘zbekiston Respublikasi investitsiyalar, sanoat va savdo vaziri Laziz Kudratov Toshkent shahrida bo‘lib o‘tgan O‘zbekiston-Mo‘g‘uliston biznes-forumida ishtirok etdi. Tadbirda ikki davlatning vazirlik va idoralari, tarmoq birlashmalari rahbarlari hamda 150 dan ortiq yirik kompaniyalar vakillari ishtirok etdi.

Laziz Kudratov o‘zining qutlov so‘zida O‘zbekiston va Mo‘g‘uliston o‘rtasidagi chuqur tarixiy do‘stona rishtalar mavjudligi, ikki davlat rahbarlari tomonidan ikki tomonlama ko‘p qirrali munosabatlarni kengaytirishga alohida e’tibor qaratilayotganini ta’kidladi.

Mamlakatimizda investitsiya va ishbilarmonlik muhitini tubdan yaxshilash bo‘yicha amalga oshirilayotgan ortga qaytmas tizimli islohotlar samaradorligi hamda bu borada barcha to‘siqlarni bosqichma-bosqich bartaraf etish, iqtisodiyotni liberallashtirish, qulay ishbilarmonlik muhitini yaratish, tadbirkorlar uchun imkoniyatlarni har tomonlama kengaytirishga qaratilgan chora-tadbirlar olib borilayotganligi alohida ta’kidlandi.

Ma’lumot uchun: 2023-yilda Mo‘g‘uliston yalpi ichki mahsuloti 18,5 milliard dollarni tashkil etdi. Shuningdek, 2023-yilda mamlakat iqtisodiyoti 7 foizga yaqin kuchli o‘sishni ko‘rsatdi. Tashqi savdo aylanmasi 24,4 milliard dollarga yetdi. Moʻgʻuliston oltin, kumush, temir, koʻmir, mis, molibden, volfram, qalay, nikel, rux, shpat kabi tabiiy resurslarga boy.

Forum davomida savdo-iqtisodiy o‘zaro manfaatli sheriklikni yanada rivojlantirishning bir qator istiqbolli yo‘nalishlari belgilab olindi. Gap tog‘-kon sanoati, qishloq xo‘jaligi, qurilish materiallari ishlab chiqarish, tibbiyot, farmatsevtika, oziq-ovqat, bank sektorini rivojlantirish va boshqa sohalar haqida bormoqda.

Nodir metalllar va bazaltning yangi konlarini birgalikda o‘zlashtirish bilan birgalikda chorvachilik va qishloq xo‘jaligi klasterlarini tashkil etish va tayyor mahsulotlarni eksportga yetkazib berish kabi loyihalarning istiqbolligi ta'kidlandi.

Qo‘shma loyihalarni muvaffaqiyatli amalga oshirish va Mo‘g‘uliston kompaniyalarining O‘zbekistonda qulay faoliyatini har tomonlama qo‘llab-quvvatlash va barcha zarur shart-sharoitlarni yaratishga tayyorlik bildirildi.

O‘z navbatida, Mo‘g‘uliston Milliy Savdo-sanoat palatasi prezidenti Dashtseren Enxtuvshin ikki mamlakat o‘rtasidagi savdo-sotiq, investitsiyaviy va sanoat kooperatsiyasini rivojlantirish imkoniyatlarini yuqori baholab, tadbirkorlarni o‘zaro hamkorlikni faol oshirishga va bu borada eng murakkab qo'shma tashabbuslar bo‘yicha ham dadil harakat qilishga chaqirdi.

Biznes-forum dasturiga muvofiq sog‘liqni saqlash, qurilish materiallari ishlab chiqarish, avtomobilsozlik, qishloq xo‘jaligi kabi sohalarda qator ikki tomonlama kelishuvlar imzolandi.

B2B va G2B formatlarida o‘tkazilgan muzokaralarda ikki mamlakat ishbilarmon doiralari vakillari yangi aloqalar o‘rnatish, yangi qo‘shma tashabbuslarning amaliy jihatlarini va rejalarini muhokama qilish imkoniga ega bo‘ldi.