Sohada manfaatlar toʻqnashuvi holatlari sodir etilishiga yoʻl qo‘yilmasligi yuzasidan yig'ilish o'tkazildi
2024-09-07 14:00:00 / Yangiliklar
Madaniyat vazirligida “Manfaatlar to‘qnashuvi to‘g‘risida”gi Qonun ijrosini samarali tashkil etish, sohada manfaatlar toʻqnashuvi holatlari sodir etilishiga yoʻl qo‘yilmasligini nazoratga olish chora-tadbirlari bo'yicha kengaytirilgan yigʻilish bo'lib o'tdi.
Unda, madaniyat vazirining birinchi o'rinbosari Avazxon Tadjixanov, Oʻzbekiston Respublikasi Bosh prokuraturasi prokurori Doston Erkinov, Korrupsiyaga qarshi kurashish agentligi mas’ul xodimi Mironshoh Rasulov hamda vazirlik markaziy apparati xodimlari, vazirlik tizimidagi barcha tizim tashkilotlari rahbarlari, Qoraqalpog‘iston Respublikasi madaniyat vaziri va vazirlik xodimlari, viloyatlar madaniyat boshqarmalari boshliqlari va xodimlari, Toshkent shahar madaniyat bosh boshqarmasi boshlig'i va xodimlari ishtirok etishdi.
Yig'ilishda, Prezidentning “Manfaatlar toʻqnashuvi toʻgʻrisida”gi 931-son Qonuni mazmun-mohiyati, Oʻzbekiston Respublikasi Bosh prokuraturasining Jinoyatlarga imkon bergan sabablar va shart-sharoitlarni bartaraf etish toʻgʻrisidagi taqdimnomasi hamda Qoraqalpogʻiston Respublikasi Prokuraturasining jinoyatning kelib chiqish sabablari va uning sodir etilishiga imkon bergan shart-sharoitlarni bartaraf etish toʻgʻrisidagi taqdimnomasi muhokama etildi.
Shuningdek, Korrupsiyaga qarshi kurashish agentligining “Manfaatlar to‘qnashuvi to‘g‘risida”gi qonun ijrosini samarali tashkil etish, sohada manfaatlar toʻqnashuvi holatlari sodir etilishiga yoʻl qo‘yilmasligini nazoratga olish chora-tadbirlari bo'yicha mas'ul xodimlarga tegishli topshiriqlar berildi.