O‘zbekiston Respublikasi Iqtisodiyot va moliya vazirligi

JPMorgan Chase & Co.  moliyaviy xolding kompaniyasi hisoblanadi. Kompaniya investitsion bank faoliyati va moliyaviy xizmatlar koʻrsatish bilan shugʻullanadi. J.P. Morgan JPMorgan Chase & Co. tarkibiga kiradi.

Global Evolution moliyaviy xizmatlar sohasidagi yetakchi xalqaro kompaniya boʻlib, investitsiya-bank faoliyati, qimmatli qogʻozlar operatsiyalari, xususiy kapital va investitsiyalarni boshqarish boʻyicha keng koʻlamli xizmatlarni taqdim etadi.

Global Evolution ixtisoslashgan investitsiya kompaniyasidir. U Generali Investments tarkibiga kiradi.

Xorijiy tomondan JP Morgan ijrochi direktori Nikolay Aleksandru-Chideschuk, Morgan Stanley Investment Management kompaniyasining rivojlanayotgan bozorlar tahlilchisi Peter Secheni, shuningdek, investitsiyalar boʻyicha direktor Kristian Mejrup qatnashdi. Oʻzbekiston tomonidan Iqtisodiyot va moliya vaziri oʻrinbosarlari Ilhomjon Umrzakov va Xurshed Mustafayev, vazir maslahatchisi Jasur Karshibayev hamda “UzAssets” boshqaruv raisi Bobur Abdinazarov ishtirok etdi.

Uchrashuv davomida tomonlar Oʻzbekistonning iqtisodiy rivojlanishi, investitsion jozibadorlikni yanada oshirish, shuningdek, qulay tadbirkorlik muhitini yaratishga qaratilgan iqtisodiy islohotlar haqida fikr almashdi. Mamlakatda davlat-xususiy sheriklik (DXSH) mexanizmlarini qoʻllagan holda amalga oshirilayotgan infratuzilma loyihalariga alohida eʼtibor qaratildi.

Xorijiy tomon makroiqtisodiy islohotlarning ijobiy dinamikasini yuqori baholab, tadbirkorlik muhitini yaxshilash va iqtisodiy barqarorlikni mustahkamlashda sezilarli yutuqlarga erishilganini taʼkidladi.

Uchrashuv yakunida tomonlar uzoq muddatli sheriklikdan manfaatdor ekanliklarini bildirdi va iqtisodiyotning turli sohalarida hamkorlikni kengaytirishga tayyorliklarini maʼlum qildi.

UzDaily.uz