Onasi DILOROM SHARIPOVAGA! Avvalo, Diyoraxondek Vatan faxrlanadigan farzandni voyaga yetkazganingiz uchun Sizga va umr yo‘ldoshingizga chin dildan tashakkur izhor qilamiz! Munosib va oqila, To‘marismonand, jasoratli qizni dunyoga berganingiz, xalqimiz faxriga aylanishi uchun oilangizda sharoit yaratganingiz uchun rahmat aytamiz! Jonajon Vatanimiz farzandi Diyora Keldiyorova Fransiya zaminida O‘zbekistonimizning davlat madhiyasini yangratgani uchun Sizga- aziz Onajonga ta’zim qilamiz! "Parij-2024" yozgi olimpiya o‘yinlarida 52 kilogrammgacha vazn toifasida barcha raqibalarini yengib, birinchi oltin medalni qo‘lga kiritib, yozgi Olimpiya o‘yinlarida O‘zbekistonimiz tarixida ilk chempion bo‘lgani uchun yana bir bor oilangizga, Diyoraxonning ustoz-murabbiylariga, mahalladoshlariga minnatdorlik bildiramiz! Diyoraxon kelgusida muhtaram Prezidentimiz va davlatimiz yaratib berayotgan imkoniyatlardan yanada samarali foydalanib, bundan-da ulkan yutuqlarni qo‘lga kiritishiga, Ona Vatanimiz bayrog‘ini ko‘klarga ko‘tarishiga ishonamiz! Xalqimiz "Ota-onadan farzandga beriladigan eng yaxshi meros odob-axloq, bilim va tarbiyadir" ma’nosidagi hadisni bejiz ko‘p takrorlamaydi. Haqiqatan ham, farzandingiz Sizga, oilangizga, Vatanimizga, xalqimizga keltirgan faxr, g‘alaba va quvonchga havasimiz keldi! Diyoraxonga onalarimiz duosi, xalqimiz ixlosi, yoshlarimiz havasi mangu yor bo‘lsin! Yurtimizda Diyoraxondek vatanparvar, jasur, To‘marisu Barchinlar kabi jasoratli qizlar ko‘paysin! Sizga cheksiz mehr, faxr va havas bilan o‘zbekistonlik onalar nomidan, Oila va xotin-qizlar qo‘mitasi.