Навоий вилояти Зарафшон шаҳар ҳокимлиги

Ассалому алайкум ҳурматли қурилиш соҳаси ходимлари, азиз бунёдкорлар! Сизларни бугунги “Қурилиш соҳаси ходимлари куни” байрами билан самимий муборакбод этаман. Қурилиш соҳаси — бу фақатгина бино ва иншоотлар бунёд этиш эмас, балки жамият келажагини яратиш, халқимиз учун қулай, хавфсиз ва замонавий яшаш шароитларини барпо этиш демакдир. Бугун Ўзбекистонимизда олиб борилаётган кенг кўламли ободонлаштириш ишлари, замонавий инфратузилма ва турар-жойлар қурилиши, ижтимоий соҳа объектлари барпо этилиши, шаҳар ва қишлоқларимиз қиёфасини тубдан янгилаш жараёнларида сизларнинг фидокорона меҳнатингиз, юксак масъулиятингиз ва касбий маҳоратингизнинг ўрни беқиёсдир. Азиз қурувчилар! Қўйган ҳар бир ғиштингиз келажак авлодлар ҳаёти учун мустаҳкам замин яратади. Сизлар яратаётган иншоотлар — бу шунчаки девор ва том эмас, балки халқимиз фаровонлигининг пойдевори, Ватанимиз тараққиётининг рамзидир. Сизларнинг меҳнатингиз туфайли республикамизнинг барча ҳудудларида янги мактаблар, шифохоналар, маданият марказлари, ишлаб чиқариш корхоналари ва замонавий турар-жой массивлари қад ростламоқда. Бугунги байрам арафасида сизларнинг фидойилигингиз, меҳнатсеварлигингиз ва ватанпарварлигингизни эътироф этиб, чуқур миннатдорлик билдирган ҳолда, сизларга мустаҳкам соғлик, оилавий фаровонлик, тинч ва осойишта ҳаёт, ишларингизда эса юксак муваффақиятлар тилайман. Ватанимиз ободлиги учун босиб ўтаётган йўлингиз доимо ёруғ бўлсин. Сизлар бунёд этаётган ҳар бир бино мустаҳкам, ҳаётингиз эса янада чиройли ва фаровон бўлсин! Байрамингиз муборак бўлсин! Ҳурмат билан, Назирбек Раҳманов