Ассалому алайкум, ҳурматли ҳамкасблар ва ҳамкорлар!

Ўзбекистон Республикасида қонун устуворлигини таъминлаш, очиқлик ва ошкоралик тамойилларининг таъсирчан шаклларини жорий этиш, давлат ташкилотлари фаолияти юзасидан самарали жамоатчилик назоратини ўрнатиш бўйича барча ҳуқуқий асослар яратилган.

Давлат ташкилотлари фаолиятининг очиқлигини таъминлаш, коррупциянинг турли кўринишларига қарши курашиш мамлакатимизда давлат сиёсатининг энг устувор йўналиши бўлиб қолмоқда.

Бунинг яққол мисоли сифатида сўнгги йилларда соҳага оид қабул қилинган концептуал аҳамиятга эга бўлган норматив-ҳуқуқий ҳужжатлар, коррупциянинг олдини олишга қаратилган маъмурий ислоҳотларни кўришимиз мумкин.

Хусусан, “Коррупцияга қарши курашиш тўғрисида”ги ва “Манфаатлар тўқнашуви тўғрисида”ги Қонунларнинг қабул қилиниши коррупцияга қарши курашиш соҳасида олиб борилаётган ислоҳотларнинг ўзига хос ҳуқуқий пойдевори бўлган бўлса, “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида” ва “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Президент Фармонлари Ўзбекистон Республикасида коррупциянинг олдини олишга қаратилган муҳим концептуал ҳужжатлар ҳисобланади.

Ҳозирги кунда, устувор вазифа коррупцияга қарши курашишда давлат ва жамият ҳаётининг барча соҳаларида коррупциянинг олдини олишга доир аниқ-чора тадбирларни белгилаш, коррупцияга оид ҳуқуқбузарликларни ўз вақтида аниқлаш, уларга чек қўйиш, коррупцияга имкон берувчи шарт-шароитларни бартараф этиш, ҳуқуқбузарликларни содир этганлиги учун жавобгарликнинг муқаррарлигини таъминлаш ҳисобланади.

Вазирлар Маҳкамаси ҳузуридаги атом энергияси Агентлиги ва тизим ташкилотларида коррупцияга қарши курашиш йўналишларини белгилаш мақсадида ички меъёрий ҳужжатлар ва тартиб-қоидалар ишлаб чиқилди.

Хусусан, Агентликда ва тизим ташкилотларида “Коррупцияга қарши курашиш сиёсати”, “Манфаатлар тўқнашувини бошқариш тўғрисида”ги Низом, “Коррупциявий хавф-хатарларни баҳолаш” Услубиёти, “Коррупцияга қарши курашиш комиссияси” Низоми Агентлик ходимларининг «Одоб-ахлоқ қоидалари» ва бошқа шу каби 14 дан ортиқ локал ҳужжатлар Агентлик ички ҳуқуқий-меъёрий ҳужжатлари сифатида қабул қилинди.

Шунингдек, Агентлик ходимларининг коррупцион ҳаракатлари юзасидан хабар бериш учун мўлжалланган алоқа каналлари ташкил этилиб, каналлар тўғрисидаги маълумотлар ташкилотнинг расмий веб-сайти ва ижтимоий тармоқ каналларида жойлаштирилди.

Давлатимиз раҳбари раислигида ўтказилган Коррупцияга қарши курашиш Миллий Кегашининг кенгайтирилган йиғилишида коррупцияга қарши қатъий сиёсатнинг асосий мақсадлари ва келгуси вазифалари аниқ белгилаб берилди.

Шу ўринда айтиб ўтиш керакки, Атом энергияси агентлиги:

коррупцион ҳаракатларнинг ҳар қандай шакл ва кўринишларини рад этади,

Агентликда коррупцияга нисбатан кескин муросасизлик шаклланишини таъминлайди,

Агентлик ва тизим ташкилотларида коррупциянинг олдини олиш ва унинг келиб чиқиш сабабларини бартараф этишга оид амалий чора-тадбирларни амалга оширади,

Коррупцияга қарши курашиш борасида қонунлар ва ҳуқуқий-меъёрий ҳужжатларга қатъий риоя этишга, ҳалоллик, очиқлик ва шаффофликни таъминлашга жиддий эътибор қаратади.

Атом энергияси агентлиги ва тизим ташкилотлари ҳар бир ходимнинг бурчи – коррупцияга қарши курашиш соҳасидаги қонунчилик ҳужжатларига онгли равишда риоя қилиш ва бунга асосий бурчимиз сифатида қарашимиздир!

 “Ўзатом” агентлиги ва тизим ташкилотлари ходимларини, ҳамкорларимизни ва фуқароларни коррупцияга қарши қонунчилик нормаларига оғишмай риоя этишга, ҳар қандай коррупцион, манфаатлар тўқнашуви ва қонунбузилиш ҳолатлари ҳақида ўз вақтида тезкорлик билан хабар беришда ҳамкорликка чақираман.

Ҳурмат билан, 
А. Ахмедхаджаев