Ўзбекистон Республикаси Вазирлар Маҳкамаси ҳузуридаги Атом энергияси агентлиги «Ўзатом» агентлиги

12-ноябрь куни “Ўзатом” агентлигида “АЭС қурилиши дирекцияси” давлат корхонаси ва Россия Федерациясининг “Росатом” давлат корпорацияси бошқарув тизимига кирувчи ташкилотлари “АТОМСТРОЙЭКСПОРТ” АЖ, “АТОМЭНЕРГОПРОЕКТ” АЖ, “И.И. Африкантов номидаги Машинасозлик Тажриба Конструкторлик Бюроси” АЖ мутахассислари билан ҳамкорликда “Ўзбекистон Республикасида КҚАСнинг хавфсизлик бўйича асосий концепцияси, РИТМ-200 реактор қурилмаларини эксплуатация қилиш тажрибаси” мавзусида техник семинар иш бошлади.

Унда "Ўзатом" агентлиги, "АЭС қурилиши дирекцияси" ДК ходимлари, мутасадди вазирлик ва идоралар вакиллари ҳамда  экспертлар иштирок этдилар.

Мазкур семинардан кўзланган мақсад  Ўзбекистон Республикасида қурилиши кўзда тутилаётган  кичик қувватли атом станцияси (КҚАС) учун РИТМ реактор қурилмасининг техник ечими, хусусиятлари, РИТМ-200Н ер усти кичик қувватли атом станцияси хавфсизлигини таъминлаш концепцияси, унинг хавфсизлиги таҳлили натижалари, КҚАС реактор қурилмаси ёқилғисини қайта юклаш ва ядро ёқилғиси билан ишлашда асосий транспорт-технологик ечимлар,  шунингдек,  қаттиқ ва суюқ радиоактив чиқиндилар билан муомала қилиш каби ядро энергияси соҳаси учун долзарб бўлган мавзуларда эксперт ва мутахассислар ўртасида очиқ мулоқот форматини ташкил этишдан иборат бўлди.

⚡️ Семинар давомида “АТОМЭНЕРГОПРОЕКТ” АЖ Бош директорнинг биринчи ўринбосари - Бирлашган лойиҳа институти бош муҳандиси Илйинский Константин Михайлович, Атом электр станцияларини эксплуатация қилиш бўйича бош муҳандис Толстов Евгений Викторович, “ОКБМ Африкантов” АЖ Бош конструктор Душев Сергей Анатолиевич, Бош конструктор ўринбосари Шёкин Дмитрий Владимирович ҳамда бошқа мутахассисларнинг маърузалари тингланди, соҳа ходимлари мавзуларга оид ўзларини қизиқтирган барча саволларга атрофлича жавоб олдилар.

Хусусан, ушбу тадбир томонлар учун ўзаро фикр алмашиш ва тажриба орттириш учун кенг майдонга айланди.

🔗 Тадбир 14-ноябргача давом этади.