Аҳолидан келиб тушган мурожаатлардан келиб чиқиб Телекоммуникатсияларни тартибга солиш агентлигида брифинг ўтказилди.
2026-11-10 11:00:00 / Янгиликлар

Давлатимиз раҳбарининг “Халқ давлат идораларига эмас, давлат идоралари халқимизга хизмат қилиши керак” деган тамойили Агентлик фаолиятининг асосий мезони этиб белгиланди. Шу боис, мурожаатлар билан ишлаш оддий ариза қабул қилиш эмас, аҳоли муаммосини амалда ҳал этиш тизими сифатида йўлга қўйилди.
Жорий йилнинг 9-ноябрга қадар Агентликка 104 та мурожаат келиб тушди. Улардан 20 таси (19,2 фоиз) Агентлик томонидан бевосита кўриб чиқилди, 84 таси (80,8 фоиз) эса мобил алоқа операторлари ва провайдерларни жалб этган ҳолда тегишлилиги бўйича ҳал этишга йўналтирилиб, ижроси назоратга олинди.
Бевосита кўриб чиқилган мурожаатларнинг 15 таси (75 фоиз) якунланди. Шундан 9 таси ижобий ҳал этилди, 6 таси бўйича фуқароларга ҳуқуқий тушунтириш берилди.
Энг муҳими, ҳисобот даврида биронта мурожаатни кўриб чиқиш муддати бузилмади ва рад этилган мурожаат қайд этилмади.
Шу билан бирга, сайёр қабуллар орқали 17 та (16,3 фоиз), ишонч телефони орқали 12 та (11,5 фоиз) мурожаат келиб тушди. Ёзма шаклда 2 та, шахсий қабулда 1 та мурожаат қабул қилинди.
Ҳудудлар кесимида энг кўп мурожаат Тошкент шаҳри (26 та), Сурхондарё (14 та) ва Сирдарё (13 та) вилоятларидан келиб тушди. Ушбу уч ҳудуд улушига жами мурожаатларнинг қарийб ярми, яъни 51 фоизи тўғри келмоқда.
Хусусан, Сурхондарё ва Сирдарё вилоятларида мурожаатлар сони аҳоли сонига нисбатан юқори бўлиб, бу ҳудудларда мурожаатлар сабабларини манзилли ўрганишни талаб этмоқда.
Шу асосда Рақамли технологиялар вазирлиги билан биргаликда алоқа қамрови паст олис, чекка ва бориш қийин ҳудудларда жойлашган 182 та аҳоли пункти рўйхати шакллантирилиб, уларда алоқа қамровини кенгайтириш ва хизматлар сифатини ошириш чоралари кўрилмоқда.
Мурожаатлар билан ишлаш самарадорлигини янада ошириш мақсадида келгусида қуйидаги вазифалар амалга оширилади:
Биринчидан. Сайёр қабуллар доимий тизимга айлантирилади. Учрашувлар ҳудудлар кесимидаги жадвал асосида ўтказилиб, ҳар бир қабулда операторлар, провайдерлар ва “Ўзкомназорат” вакилларининг иштироки таъминланади.
Иккинчидан. Мурожаатлар кўп бўлган ҳудудларда манзилли ўрганиш ўтказилади. Тошкент шаҳри, Сурхондарё ва Сирдарё вилоятларида мурожаатлар сабаблари таҳлил қилиниб, такрорий мурожаатларнинг олдини олиш чоралари кўрилади.
Учинчидан. Мурожаатлар рақамли назоратга олинади. Яратилаётган сифат мониторинги тизимида алоҳида “Мурожаатлар” модули назарда тутилган бўлиб, сифат кўрсаткичлари доимий таҳлил қилинади. Бу орқали муаммоларни мурожаат келиб тушишидан олдин аниқлаш ва бартараф этиш тартибига ўтилади.
Тўртинчидан. Мобил алоқа қамрови паст бўлган олис аҳоли пунктларини алоқа билан таъминлаш бўйича ваколатли органлар билан биргаликда ишлар ташкил этилади.
Келгусида Телекоммуникатсияларни тартибга солиш агентлиги “Янги Ўзбекистонда ҳар бир инсон учун сифатли, адолатли ва ишончли телекоммуникатсия хизматларини таъминлаш” мақсадидан келиб чиқиб, телекоммуникатсия соҳасида хизматлар сифати ва оммабоплигини оширишга қаратилган чора-тадбирларни изчил давом эттиради.


