Соғлиқни сақлаш вазирининг тегишли буйруғи билан Алимов Аҳрорбек Абдурасулович Болалар миллий тиббиёт маркази директорининг даволаш ишлари бўйича ўринбосари этиб тайинланди
2026-05-05 15:30:00 / Янгиликлар
А. Алимов 2014 йилда Тошкент педиатрия тиббиёт институтинниг бакалавриат, 2017 йилда магистратура босқичини тамомлаган.
Меҳнат фаолиятини Тошкент шаҳар болалар клиник шифохонасида навбатчи реаниматолог сифатида бошлаб, 2017 йилдан Тошкент педиатрия тиббиёт институти “Шошилинч педиатрия, ҳалокатлар тиббиёти” кафедраси ассистенти сифатида ишлаган.
Тиббиёт фанлари бўйича фалсафа доктори (PhD) А.Алимов тайинловга қадар Болалар миллий тиббиёт марказининг Анестезиология ва реанимация бўлими мудири сифатида меҳнат қилиб келаётган эди.
Шунингдек, ёш мутахассис болаларда интенсив даволаш йўналиши бўйича бир йил давомида дунёнинг энг кучли ТОП-100 олий ўқув юртлари рўйхатига киритилган Сеул Миллий университетининг тиббиёт факультетида билим ва малака ошириб қайтган.
Янги раҳбарга юртимизда болалар тиббиёти соҳасига энг илғор диагностика ва даволаш усуллари, сунъий интеллект ва робот технологияларини кенг татбиқ этиш, тиббий хизматлар сифати ва беморлар хавфсизлигини ошириш, соҳа мутахассислари касбий малакасини узлуксиз ривожлантириш, ихтисослаштирилган тиббий хизматни қуйи бўғинларга тушириш каби қатор вазифалар юклатилди.
Соғлиқни сақлаш вазирлиги
Матбуот хизмати.