Қўқон шаҳар ҳокими Гарвард университети мутахассислари билан онкологик касалликларни эрта аниқлаш масаласини муҳокама қилди
2026-10-12 10:10:00 / Янгиликлар
Мазкур усул колоректал саратонни, яъни йўғон ва тўғри ичак саратонларини дастлабки босқичларда аниқлашга қаратилган. Бунда нажасдаги яширин қонни аниқловчи иммунокимёвий тест (FIT) қўлланилиб, текширув натижаларига кўра зарур ҳолларда фуқаролар колоноскопияга йўналтирилади.
Асака туманида амалга оширилган лойиҳа доирасида замонавий лаборатория ускуналари ва тест тўпламларидан фойдаланиш билан бир қаторда, маҳаллий тиббиёт мутахассисларини тайёрлашга ҳам алоҳида эътибор қаратилган.
Музокараларда ушбу тажрибани Қўқон шаҳрида қўллаш имкониятлари, тиббиёт муассасаларининг тайёргарлиги ва халқаро ҳамкорликни ривожлантириш масалалари кўриб чиқилди.
Мазкур ташаббус онкологик касалликларни эрта аниқлаш, аҳолининг профилактик текширувлар билан қамровини кенгайтириш ва тиббий хизматлар сифатини оширишга хизмат қилиши мумкин.