Қўқон шаҳрида туризм инфратузилмасини ташкил этишда Қашқар шаҳри тажрибасидан фойдаланилади
2026-08-30 10:10:00 / Янгиликлар
Айни кунларда Хитой Халқ Республикасида Ўзбекистон делегацияси таркибида хизмат сафарида бўлиб турган Қўқон шаҳар ҳокими Маруфжон Усмонов Қашқар шаҳар ҳокими ва Шинжон-Уйғур автоном ҳудуди туризм ва маданият бошқармаси мутасаддилари билан музокаралар олиб бориб, Қашқар шаҳрида туризм ва миллий ҳунармандчиликни ривожлантириш борасида амалга оширилган ишлар билан танишди.
Қашқар шаҳрининг туризм салоҳияти қадимий шаҳар муҳити, Ипак йўли мероси, уйғур миллий маданияти, ҳунармандчилик, бозорлар, гастрономия ва Помир тоғларига яқинлиги билан боғлиқ. Бу ерда тарихий кўчалар, анъанавий уйлар, ҳунармандчилик устахоналари, миллий таомлар ва маданий дастурлар бирлаштирилган.
Қашқар тажрибасининг энг муҳим жиҳати — битта тарихий объектни эмас, бутун шаҳарни туристик маҳсулотга айлантириш. Қўқонда ҳам Худоёрхон ўрдаси, Мадарихон, Даҳмаи Шоҳон, Жоме масжиди, тарихий маҳаллалар, ҳунармандчилик, миллий таомлар ва анъанавий савдони ягона пиёда туристик маршрутга бирлаштириш катта салоҳиятга эга.