Бош вазир ўринбосари — Оила ва хотин-қизлар қўмитаси раиси Зулайҳо Махкамова Қашқадарёда

Дастлаб, Бош вазир ўринбосари Деҳқонобод туманида жойлашган "Оила ва хотин-қизлар маскани"да бўлиб, масканда ташкил этилган хизматлар сифатини ошириш, хотин-қизларнинг бандлигини таъминлаш, ҳуқуқий, психологик ва тиббий ёрдам кўламини кенгайтириш бўйича фикрлар билдирилди.

Сўнг Вазирлар Маҳкамасининг 376-сонли қарорига асосан ташкил этилган “Тадбиркорлик ва саломатлик маркази”да олиб борилаётган ишлар кўздан кечирилди. Касаначилик билан шуғулланаётган Умида Шукурова ва Гулноз Жўраева билан суҳбатлашилиб, уларнинг фаолияти ва эҳтиёжлари муҳокама қилинди.

Бош вазир ўринбосари хотин-қизларни касбга ўқитиш, бандлигини таъминлаш, замонавий технологияларни жорий этиш ҳамда ҳудуд имкониятларидан келиб чиқиб янги иш ўринларини яратиш зарурлигини таъкидлади.

Тадбиркор Маърифат Ибрагимова билан бўлиб ўтган суҳбатда эса фаол аёлларнинг ижтимоий ҳаётдаги ўрни ва уларни рағбатлантириш масалалари муҳокама қилинди.