Оилаларни мустаҳкамлаш ва ёшларни никоҳга тайёрлаш масалалари муҳокама қилинди

Унда оилаларни мустаҳкамлаш, ёшларни оилавий ҳаётга тайёрлаш, никоҳланаётган шахсларни тиббий кўрикдан ўтказиш ҳамда “Оила ва хотин-қизлар масканлари” фаолиятини самарали ташкил этиш масалалари кўриб чиқилди.

Йиғилишда адлия, ички ишлар, соғлиқни сақлаш, мактабгача ва мактаб таълими, камбағалликни қисқартириш ва бандлик вазирликлари, Ўзбекистон маҳаллалари уюшмаси, Ёшлар ишлари агентлиги, Дин ишлари бўйича қўмита, Оила ва гендер илмий-тадқиқот институти масъуллари иштирок этди.

Бугунги кунга қадар 184 та туман ва шаҳарда “Оила ва хотин-қизлар масканлари” ташкил этилган. Шунингдек, 2025 йилнинг 6 ойида 95 мингдан зиёд никоҳ расмийлаштирилиб, 200 мингдан ортиқ ёш тиббий кўрикдан ўтгани маълум қилинди.

Йиғилишда “Оила ва хотин-қизлар масканлари” фаолиятини янада кучайтириш, никоҳланаётган шахсларни оилавий ҳаётга тайёрлаш тизимини такомиллаштириш, тиббий кўрик жараёни самарадорлигини ошириш, масъулиятли ота-оналик ва соғлом турмуш тарзини кенг тарғиб қилиш юзасидан устувор вазифалар белгилаб олинди.