Бухоро-Цзясин шаҳри ўртасидаги саноат ярмаркаси иш бошлади

Бугунга келиб  вилоятда 4200 та атрофида саноат ишлаб чиқариш ва хизмат кўрсатиш корхонаси, 200 дан зиёд хорижий инвестиция иштирокидаги корхона самарали фаолият кўрсатаётган бўлиб, уларда 42 мингдан ошиқ ишчи-мутахассиснинг бандлиги таъминланмоқда. 

Президентимиз Шавкат Мирзиёев ташаббуси билан иқтисодиёт тизимини либераллаштириш, қулай инвестиция муҳитини яратиш ислоҳотларнинг энг муҳим йўналишларига айланди. Бу ислоҳотларнинг амалий ифодаси сифатида Бухоро вилоятида ҳам хорижий инвесторларга бизнесни амалга ошириш учун кенг имкониятлар таклиф этилмоқда. Вилоятимизда асосий тармоқлар сифатида пахтани қайта ишлаш, енгил саноат, озиқ-овқат, қишлоқ хўжалиги, қурилиш, нефть-газ саноатлари ҳамда туризм сектори изчил ривожлантирилмоқда. 

Ҳар йили анъанавий ташкил этиб келинаётган ҳудудий тармоқлараро саноат ярмаркалари қурилиш материаллари, тўқимачилик, нефт ва газ саноати, қишлоқ ва сув хўжалиги, туризм саноати учун маҳсулотлар ишлаб чиқариш ҳамда қоракўлчилик соҳалари каби етакчи тармоқлар фаолияти учун дастуриламал вазифасини ўтамоқда.  

Билим ва малакаларни баҳолаш агентлигининг Бухоро вилояти бўлими биносида Хитойнинг Цзясин шаҳри тадбиркорлари саноат кўргазмаси ташкил қилингани ҳам икки давлат ишбилармонлари ўртасидаги ўзаро ҳамкорликни ривожлантиришга хизмат қилади, албатта. 

Вилоятимиздаги тармоқ ва ҳудудий саноат корхоналари раҳбарлари, тадбиркорлар ва ташкилотчи масъуллар, оммавий ахборот воситалари вакиллари иштирок этган тадбирда вилоят ҳокими Ботир Зарипов ҳамда Хитойнинг Цзясин шаҳридаги “Ўзбекистон—Хитой савдо уйи” раҳбари Чин Ю Пин сўзга чиқишиб, саноат ярмаркаси унда иштирок этаётган тадбиркорлар, ўз имкониятларини ошириш ҳисобидан маҳаллийлаштириш ва экспорт салоҳиятини юксалтиришга ҳисса қўшаётган хитойлик ҳамда маҳаллий бизнес вакиллари, муассасалар, ишлаб чиқариш корхоналари учун муҳим аҳамият касб этишини эътироф этишди.

Таъкидланганидек, айни кунда Ўзбекистон—Хитой ҳамкорлик муносабатлари кенг кўлам касб этиб, ҳар иккала давлат ўртасидаги яқин дўстлик ҳамда ўзаро шериклик алоқалари юксак даражага кўтарилмоқда.

Хитой Халқ Республикаси Бухоро вилояти билан ташқи савдо айланмасида юқори улушга эга бўлган 5 та давлатлардан бири эканини сўнгги 8 йилда ўзаро ташқи савдо айланмаси икки баробарга ўсганида ҳам кўриш мумкин. Жумладан, 2024 йилда Хитой Халқ Республикаси ўртасидаги ўзаро ташқи савдо айланмаси 401 миллион АҚШ долларини ташкил этиб, 2023 йилнинг мос даврига нисбатан 106 фоизга ўсган. Шунингдек, экспорт ҳажми 23 миллион АҚШ доллари ва импорт ҳажми 378 миллион АҚШ долларини ташкил этган. 

“Хом ашёдан тайёр маҳсулотгача” узвий тамойили асосида вилоятимизда жорий йилда тўқимачилик корхоналари томонидан тўлиқ циклли ишлаб чиқариш йўлга қўйилмоқда. Шу нуқтаи назардан, айни пайтда текстиль маҳсулотлари ишлаб чиқариш соҳасига, бундан ташқари, табиий қазилма-кон ресурси тармоғида табиий қоплама тош, қурилиш ва силикатли маҳсулотлар учун қум, ғишт ва кафел хом-ашёси, оҳак тош, қурилиш тоши, гипс ва ангидрит, графит, цемент ва бошқа хом ашёга бой қурилиш материаллари ишлаб чиқариш соҳасига, қолаверса, ижтимоий соҳани ривожлантиришда таъминотчи тармоқлар фаолиятини ривожлантиришга сармоя киритишга эътибор кучайтирилмоқда.

Бугунга келиб Бухоро вилоятида 4 та махсус иқтисодий зона фаолият юритатган бўлиб, саноатга ихтисослашган “Ғиждувон”, “Қоракўл” эркин иқтисодий зоналари, шу қаторда “Бухоро саноатни ривожлантириш комплекси” махсус саноат парки ҳамда қишлоқ хўжалигига ихтисослашган “Бухоро-агро” эркин иқтисодий зонаси имкониятлари оширилмоқда. 

Таҳлиллардан кўринишича, ҳозирда вилоятда 450 тадан ортиқ хорижий инвестиция иштирокидаги корхона фаолият кўрсатаётган бўлса, вилоятимиз тадбиркорлари ва Хитой Халқ Республикаси компаниялари ҳамкорлигида 70 та хорижий инвестиция иштирокидаги корхона фаолият кўрсатаётган бўлиб, шундан 25 таси тўла-тўкис Хитой капиталидаги хорижий корхона ҳисобланади.

Хорижий инвесторлар учун ҳудудда яратилган имтиёзлардан фойдаланган ҳолда энергетика, тўқимачилик, қурилиш материаллари, фармацевтика, кимё, чарм-пойабзал, электротехника саноати соҳаларида ва қишлоқ хўжалиги соҳаларида инвестиция лойиҳаларини амалга ошириш, эркин иқтисодий саноат зоналарида енгил саноат корхоналарини ташкил этиш ҳамда қишлоқ хўжалиги маҳсулотларини сақлаш, қайта ишлаш технологияларини ўрнатиш ва бошқа йўналишларда ҳамкорлик таклиф этилмоқда. 

Ярмарка доирасида “Ғиждувон” эркин-иқтисодий зонаси ҳамда Асбоб-ускуналар ишлаб чиқарувчилар уюшмаси ўртасида икки томонлама Англашув меморандуми имзоланди.

Вилоятда ўтаётган саноат кўргазмаси доирасида Хитой Халқ Республикасининг 50 тадан ортиқ компанияси ўз маҳсулот намуналари ва стендлари билан иштирок этмоқда. Икки кун давом этадиган ярмаркада икки ҳудуд тадбиркорлари ва ишбилармон доира вакиллари иштирокидаги бизнес музокаралар ўтказилиши кўзда тутилган.