Музокараларда Ўзбекистон делегациясига Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов бошчилик қилди, шунингдек, Қишлоқ хўжалиги вазири ўринбосари Алишер Шукуров ҳам қатнашди. Шу билан бирга, ФАО томонидан Бош котиб ўринбосари ва ташкилотнинг Яқин Шарқ ва Шимолий Африкадаги минтақавий вакили Абдулҳаким Элваер, Ер ва сув ресурслари департаменти бошлиғи Ли Лифенг, Ўрмон хўжалиги бўлими бошлиғи Қи Минг Ву, техник мутахассис Ферас Зиодат ва ФАОнинг Ўзбекистондаги вакили ўринбосари Шерзод Умаров иштирок этди. 

Учрашувда ҳамкорликнинг асосий йўналишлари, жумладан, иқлим ўзгаришига қарши курашиш, атроф-муҳитни муҳофаза қилиш ва қишлоқ хўжалигини барқарор ривожлантириш масалалари муҳокама қилинди. Ўзбекистон делегацияси ушбу соҳалардаги ташаббусларни амалга оширишда кўрсатаётган ёрдами учун ФАОга миннатдорлик билдирди.

Асосий масалалардан бири ФАОнинг Ўзбекистондаги ваколатхонаси ташаббуси билан “FOLUR” лойиҳаси доирасида тайёрланган “Ўзбекистонда қум ва чанг бўронлари таъсирини аниқлаш ва уларни бартараф этиш учун атмосферани моделлаштириш” ҳисоботи бўлди. Ҳужжатда чанг бўронларининг келиб чиқиш сабаблари, оқибатлари ва уларни юмшатишнинг барқарор омилларга асосланган ечимлари таҳлил қилиниб, тадқиқот жараёнида чанг манбалари, ер қоплами ва минтақавий иқлим шароитлари ўртасидаги ўзаро таъсирларни баҳолаш учун илғор RAMS/ICLAMS моделлаштириш тизимидан фойдаланилган.

Бундан ташқари, учрашув давомида “Яшил макон” миллий дастури, хусусан, унинг доирасида кенг кўламли равишда ўрмонлаштириш чора-тадбирларини кўзда тутувчи ҳамкорлик масалаларига ҳам алоҳида эътибор қаратилиб, Оролбўйи минтақаси муаммосини ҳал қилишда халқаро ҳамкорликни мустаҳкамлаш муҳимлиги, умуман, минтақада экологик мувозанатни тиклашда Марказий Осиё давлатларининг биргаликдаги саъй-ҳаракатлари талаб этилиши таъкидланди. 

Якунда томонлар шерикликни мустаҳкамлаш, табиий  асраш ва минтақанинг барқарор ривожланишига ҳисса қўшадиган қўшма ташаббусларни амалга оширишга содиқ эканликларини тасдиқладилар.