Фарғона ва Нонсан: агротехнологиялардан инновацияларгача янги ҳамкорлик йўналишлари белгилаб олинди

Мулоқотда икки ҳудуднинг иқтисодий алоқаларини мустаҳкамлаш, мавжуд тажрибалардан самарали фойдаланиш ва аниқ лойиҳаларга асосланган ҳамкорликни йўлга қўйиш масалалари хусусида сўз юритилди.

Вилоят ҳокими Ўзбекистон ва Корея Республикаси ўртасидаги муносабатлар жадал ривожланиб бораётганини алоҳида қайд этди. Президент Шавкат Мирзиёевнинг айни кунларда Корея Республикасига амалга ошираётган давлат ташрифи икки мамлакат ўртасидаги алоҳида стратегик шериклик муносабатларини янада мустаҳкамлаб, ўзаро ҳамкорликни сифат жиҳатидан янги босқичга олиб чиқиши таъкидланди.

Нонсан — қишлоқ хўжалиги ва саноатни замонавий технологиялар билан уйғун ривожлантираётган Корея шаҳарларидан бири. Айниқса, шаҳар қулупнай етиштириш бўйича мамлакатда кенг танилган. Бу ерда маҳсулот етиштиришнинг ўзи билан чекланиб қолмасдан, агротехнологияларни жорий этиш, қайта ишлаш, қўшимча қиймат яратиш ва тайёр маҳсулотни бозорга олиб чиқишга комплекс ёндашилмоқда. 2027 йилда шаҳарда Nonsan World Strawberry Industry Expo — Нонсан жаҳон қулупнай саноати кўргазмаси ўтказилади.

Учрашувда айнан шу тажриба Фарғона вилояти учун ҳам қизиқиш уйғотиши қайд этилди. Вилоятнинг қишлоқ хўжалиги салоҳиятини Нонсаннинг агротехнологик ечимлари билан боғлаш, мева-сабзавот маҳсулотларини чуқур қайта ишлаш, замонавий иссиқхона ва интенсив етиштириш технологияларини татбиқ этиш бўйича ҳамкорлик имкониятлари муҳокама қилинди. Хусусан, Нонсаннинг қулупнайчилик соҳасидаги илғор тажрибаси асосида Фарғонада замонавий кўчатчилик ва интенсив етиштириш марказини ташкил қилиш таклифи билдирилди.

Фарғоналик ёш мутахассисларни Нонсанга қисқа муддатли стажировкаларга юбориш, кореялик мутахассисларни Фарғонага таклиф этиш, университетлар ва илмий марказлар ўртасида қўшма дастурларни йўлга қўйиш борасида фикр алмашилди.

Нонсан тараққиётининг яна бир муҳим жиҳати — иқтисодиёт, қишлоқ хўжалиги ва туризмни ягона ривожланиш занжирига бирлаштиришга қаратилган ёндашувдир. Айни пайтда шаҳарнинг янги иқтисодий стратегиясида мудофаа саноати, сунъий интеллект ва илмий-тадқиқот ҳамда тажриба-конструкторлик ишлари — R&D йўналишларига ҳам алоҳида эътибор қаратилмоқда.

Хайрулло Бозоров Фарғона вилоятида инвесторлар учун яратилган шароитлар, саноат ва аграр соҳада амалга оширилаётган лойиҳалар, шунингдек, замонавий технологияларни жалб этишга қаратилган ишлар ҳақида маълумот берди.

Мулоқот якунида Фарғона ва Нонсан ўртасида тадбиркорлар ҳамда соҳавий ташкилотларнинг тўғридан-тўғри алоқаларини кенгайтириш, ўзаро ташрифларни йўлга қўйиш ва истиқболли ташаббусларни амалий лойиҳаларга айлантириш муҳим экани таъкидланди. "Йўл харитаси" ишлаб чиқилиб, амалий ҳамкорликни ривожлантиришга келишилди.