Соғлиқни сақлаш соҳасидаги ҳамкорликни кенгайтириш истиқболлари муҳокама қилинди

Мулоқот давомида томонлар Ўзбекистон ва Саудия Арабистони ўртасидаги кўп қиррали муносабатлар изчил ривожланиб бораётганини мамнуният билан қайд этди. Хусусан, соғлиқни сақлаш йўналиши икки мамлакат ўртасидаги амалий ҳамкорликнинг муҳим ва истиқболли соҳаларидан бири экани таъкидланди.

Учрашувда ушбу соҳадаги икки томонлама ҳамкорликни янада ривожлантириш, соғлиқни сақлаш тизимида амалга оширилаётган ва истиқболда режалаштирилаётган лойиҳаларнинг самарадорлигини ошириш, уларнинг қамрови ҳамда кўламини кенгайтириш масалаларига алоҳида эътибор қаратилди.

Хусусан, муҳокамалар давомида томонлар соғлиқни сақлаш тизимини рақамлаштириш, замонавий ахборот технологиялари ва инновацион ечимларни жорий этиш бўйича ҳамкорликни ривожлантириш, шунингдек, соғлиқни сақлаш соҳасида давлат-хусусий шериклик асосида амалга оширилаётган лойиҳалар масалаларига алоҳида эътибор қаратди.

Шунингдек, томонлар мавжуд имкониятлардан самарали фойдаланиш, илғор халқаро тажрибани ўрганиш ва амалиётга жорий этиш орқали тиббий хизматлар сифатини янада яхшилаш, тиббиёт соҳасида малакали кадрлар тайёрлаш ҳамда мутахассисларнинг касбий билим ва кўникмаларини ошириш юзасидан фикр алмашди.

Жумладан, Саудия Арабистонининг инвестициявий, технологик ва бошқарув тажрибасини жалб қилиш, икки мамлакат хусусий сектори вакиллари ўртасида тўғридан-тўғри алоқаларни ривожлантириш ҳамда истиқболли лойиҳаларни биргаликда ишлаб чиқиш масалаларига эътибор қаратилди.

Учрашув якунида томонлар ўзаро манфаатли ҳамкорликни янада кенгайтириш, тегишли ташкилотлар ва мутахассислар ўртасидаги бевосита алоқаларни мустаҳкамлаш ҳамда аниқ ва истиқболли лойиҳаларни биргаликда ишлаб чиқишга тайёр эканликларини билдирди.