Оилалар мустаҳкамлигига салбий таъсир қилувчи омилларни барвақт аниқлаш ва бартараф этиш бўйича ҳамкорлик янги босқичга кўтарилади
2026-06-03 10:30:00 / Янгиликлар
Йиғилишдан кўзланган асосий мақсад — Ўзбекистон Республикаси Вазирлар Маҳкамасининг 2026 йил 19 майдаги "Ёшларни оилавий ҳаётга тайёрлаш тизимини янада такомиллаштириш ҳамда оилавий маслаҳат хизматларини ташкил этиш чора-тадбирлари тўғрисида"ги 257-сонли қарори ижросини таъминлаш бўйича идоралараро самарали ҳамкорликни йўлга қўйишдан иборат.
Мазкур қарор "Оила ва хотин-қизлар масканлари"ни мамлакатимизнинг барча ҳудудларида тўлақонли ва изчил фаолият юритувчи ягона тизимга айлантириш, уларда кўрсатиладиган хизматлар сифати ва қамровини тубдан оширишга қаратилган. Йиғилишда ҳар бир вазирлик ва идора олдига аниқ муддатлар билан вазифалар қўйилди ҳамда уларнинг ижро механизмлари келишиб олинди.
Белгиланган вазифалар доирасида 2026 йил 10 июнгача манфаатдор вазирлик ва идоралар иштирокида Масканлар фаолиятини ташкил этиш бўйича Қўшма қарор лойиҳаси тайёрланади ва тасдиқланади.
Шунингдек, намунали дастурлар, алгоритмлар, йўриқномалар ҳамда ягона тарғибот-услубий материаллар — буклетлар ва рақамли инфографикалар ишлаб чиқилиб, барча масканларга етказилади.
Адлия вазирлиги билан ҳамкорликда масканларда ҳуқуқий ва психологик хизматлар кўрсатиш учун мутахассисларни жалб этишга доир намунавий фуқаролик-ҳуқуқий шартнома лойиҳаси тайёрланади.
Босқичма-босқич барча ҳудудларда масъул ташкилотлар ва жамоатчилик вакиллари иштирокида намунавий ўқув семинарлари ўтказилади. Мазкур семинарларда масканлар тизимини самарали йўлга қўйиш бўйича амалий тавсиялар ишлаб чиқилади ва уларнинг бажарилиши қатъий назоратга олинади.
Масканлар фаолияти самарадорлигини баҳолаш мақсадида ягона электрон рейтинг тизими жорий этилади. Ҳар ой якуни бўйича KPI (KPI) натижалари умумлаштирилади, чорак ва йил якунида эса таҳлилий маълумотлар тайёрланиб, тегишли раҳбарларга тақдим этиб борилади.
Йиғилиш якунида Вазирлар Маҳкамасининг ушбу қарори ижросини белгиланган муддатларда, сифатли ва тўлиқ ҳажмда таъминлаш барча масъул идоралар учун устувор вазифа экани алоҳида таъкидланди. Оила ва хотин-қизлар масканлари давлатимизнинг оила институтини мустаҳкамлаш ҳамда хотин-қизларни ҳар томонлама қўллаб-қувватлаш сиёсатини бевосита амалиётга татбиқ этувчи асосий механизм сифатида доимий равишда такомиллаштириб борилади.