Қорақалпоғистон Республикасида хотин-қизлар масалаларига бағишланган амалий тадбирлар давом этмоқда

Семинарда Зулайҳо Махкамова мавзу юзасидан атрофлича фикр билдириб, бугун ҳар бир хонадон остонадаги имкониятларни қадрлаши кераклиги, оила фаровонлиги кўп жиҳатдан мавжуд имкониятлардан оқилона ва самарали фойдаланишга боғлиқ эканини таъкидлади. Шунингдек, фаол кексалик умрни узайтиради, деган ҳаётий ғояга алоҳида урғу бериб, кексаларнинг ҳаётий тажрибаси, дуоси ва иштирокидаги тарбия муҳити оила барқарорлигининг муҳим омили эканини қайд этди.

Тадбирда, шунингдек, бугунги дунёнинг нотинчлиги барчамизни огоҳ ва ҳушёр бўлишга ундаши кераклиги, айниқса, оила тарбияси, маънавий муҳит ва фарзандлар камолига дахлдор масалаларда масъулиятни яна-да ошириш лозимлиги, оила деган қўрғон мустаҳкам бўлса, ҳар қандай муаммо чекиниши керак. Зеро, илм-маърифат, қонун ва қадриятга таянган оилаларни қуриш бугунги куннинг энг долзарб вазифаларидан бири экани таъкидланди.

Шундан сўнг Тахиатош туманида жойлашган “Оила ва хотин-қизлар маскани” фаолияти билан танишилди. Масканда хотин-қизларни ижтимоий қўллаб-қувватлаш, бандлигини таъминлаш, ҳуқуқий ва психологик ёрдам кўрсатишга қаратилган ишлар кўздан кечирилди.

Ташриф давомида Бош вазир ўринбосари “Маиший зўравонликсиз бахтли оилавий ҳаёт” мавзусига алоҳида тўхталиб, оилада соғлом муҳитни қарор топтириш, хотин-қизлар ҳуқуқ ва манфаатларини ҳимоя қилиш, оилалар тинч ва фаровонлиги учун бажариладиган устувор вазифаларни белгилаб берди.