Хотин-қизлар ва оилалар фаровонлиги йўлидаги долзарб масалалар муҳокама қилинди

Унда Қорақалпоғистон Республикаси, вилоятлар ва Тошкент шаҳар, шунингдек, туман ва шаҳарлар даражасидаги масъул раҳбарлар иштирок этиб, мамлакатимизда хотин-қизларни қўллаб-қувватлаш, оилаларни мустаҳкамлаш, аёллар ва болалар ҳуқуқларини ҳимоя қилиш борасида амалга оширилаётган ишлар ҳамда галдаги устувор вазифалар атрофлича муҳокама қилинди.

Йиғилиш аввалида Ўзбекистон Республикаси Президентининг 2026 йил 16 февралдаги ПФ–21-сон ҳамда ПФ–22-сон Фармонларида белгиланган вазифалар, хусусан, “Ўзбекистон–2030” стратегияси ва 2026 йил Давлат дастури ижроси доирасида ҳудудларда олиб борилаётган ишлар таҳлил қилинди. Мазкур йўналишда амалга оширилаётган ишлар, эришилган натижалар, мавжуд муаммолар ва уларни бартараф этиш чоралари юзасидан масъуллар томонида ахборот берилди.

Таъкидланганидек, давлат дастурларида белгиланган мақсад ва вазифаларнинг ижросини қуйи бўғингача самарали етказиш, ҳар бир ҳудуд кесимида аниқ натижадорликка эришиш бугунги куннинг энг муҳим талабларидан бири ҳисобланади.

Шундан сўнг, Ўзбекистон Республикаси Президентининг 2026 йил 3 мартдаги “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чора-тадбирлар тўғрисида”ги ПФ–33-сон Фармонида белгиланган вазифалар ижроси муҳокама марказида бўлди. Хусусан, эрта ва қонуний никоҳни расмийлаштирмасдан турмуш қуриш ҳолатларининг олдини олиш, никоҳнинг оптимал ёши — 21 ёшнинг афзалликларини халқчил ва таъсирчан шаклларда кенг тарғиб этиш, никоҳланувчи ёшларни оилавий ҳаётга пухта тайёрлаш масалаларига алоҳида эътибор қаратилди.

Йиғилишда, шунингдек, аёллар ва болаларга нисбатан тазйиқ ва зўравонликнинг олдини олиш, оила ва хотин-қизлар масканларида никоҳланувчиларни “маиший зўравонликсиз бахтли оилавий ҳаётга тайёрлаш” махсус курсларида бепул ўқитиш, низоли оилалар билан манзилли ишлаш, “Оила профили” модули фаолиятини янада такомиллаштириш, низоларни барвақт аниқлаш ва оилани барқарорлаштириш орқали оилавий ажримларнинг олдини олиш борасидаги ишлар юзасидан ҳудудлар кесимида амалга оширилаётган чора-тадбирлар кўриб чиқилди. Бу борада тизимли ёндашувни кучайтириш, кунлик назоартни амалга ошириш, маҳаллаларда сайёр қабуллар ўтказишни тизимли амалга ошириш ҳамда ҳар бир мурожаат ва ҳолат билан индивидуал ишлаш зарурлиги таъкидланди.

“Ҳар бир раҳбар ўз ҳудудида хотин-қизлар ва оилалар билан ишлашни кундалик фаолиятнинг энг муҳим мезони деб билиши керак. Натижа бор жойда ишонч, ишонч бор жойда эса тараққиёт бўлади”, — деди Бош вазир ўринбосари.

Кун тартибидаги навбатдаги муҳим масала хотин-қизлар ўртасида ҳуқуқбузарлик ва жиноятчиликнинг олдини олиш, хусусан, жиноятчилик кўрсаткичи юқори бўлган 81 та маҳаллада олиб борилаётган профилактик ишлар таҳлилига бағишланди. «Е-ижтимоий профилактика» тизими билан ишлаш, вояга етмаган қизларнинг бедарак кетишининг олдини олиш, хотин-қизлар билан боғлиқ салбий ҳолатларни эрта аниқлаш ва бартараф этиш борасидаги амалий чораларга алоҳида урғу берилди. Масъуллар томонидан бу йўналишдаги фаолиятни кучайтириш, профилактика самарадорлигини ошириш ва ҳудудларда масъулиятни янада мустаҳкамлаш юзасидан таклифлар билдирилди.

Йиғилиш давомида Ўзбекистон Республикаси Президентининг 8 март — Халқаро хотин-қизлар кунига бағишланган тантанали маросимдаги мурожаатининг мазмун-моҳияти ва аҳамиятини тарғиб этиш, ундан келиб чиқадиган устувор вазифаларни ҳар бир маҳаллада тўлиқ ҳажмда ижросини ташкил этиш борасида тегишли чора-тадбирлар белгиланди. Хусусан, хотин-қизларнинг жамиятдаги ўрни ва нуфузини янада ошириш, уларнинг ҳуқуқ ва манфаатларини таъминлаш, бандлигини қўллаб-қувватлаш, саломатлигини мустаҳкамлаш, илм-фан, таълим, тадбиркорлик ва бошқарувдаги фаоллигини кенгайтириш бўйича олдинда турган вазифалар белгилаб олинди.

Шунингдек, йиғилишда келаётган Рамазон ҳайити ҳамда Наврўз айёмини муносиб нишонлаш, республикамиз бўйлаб ташкил этиладиган умумхалқ ҳашарларида фаол иштирок этиш, ҳудудларда ободонлаштириш ва кўкаламзорлаштириш ишларини изчил давом эттириш, янги кўчатлар экиш ҳамда “Аёллар боғи”ни ташкил этиш бўйича ҳам муҳим вазифалар белгиланди. Бу борадаги ишларни маҳаллалар, таълим муассасалари, меҳнат жамоалари ва кенг жамоатчилик иштирокида уюшқоқлик билан ташкил этиш зарурлиги қайд этилди.

Йиғилиш якунида Зулайҳо Махкамова томонидан барча масъулларга белгиланган топшириқлар ижросини сўзсиз таъминлаш, ҳар бир ҳудудда манзилли, тизимли ва натижадор ишларни йўлга қўйиш, хотин-қизлар ва болалар ҳуқуқлари ва манфаатларини ҳимоя қилиш, оилаларда соғлом маънавий муҳитни мустаҳкамлаш ҳамда жойларда амалий натижа берадиган ташаббусларни кенгайтириш юзасидан аниқ кўрсатмалар берилди.