Фарғонада “Оила ва никоҳ – муқаддас" форуми бўлиб ўтди

Республика Оила ва хотин-қизлар қўмитаси, Фарғона вилояти ҳокимлиги ҳамда вилоят Оила ва хотин-қизлар бошқармаси ҳамкорлигида Фарғона вилояти Ахборот-кутубхона марказида “Оила ва никоҳ – муқаддас” мавзусида ўқув-семинар ташкил этилди.

Семинарда Оила ва хотин-қизлар қўмитаси ҳамда тизимнинг вилоят, туман ва шаҳар бўлимлари раҳбарлари, Адлия вазирлигининг ФҲДЁ органлари фаолиятини мувофиқлаштириш ва назорат қилиш бўлими мутахассислари, Оила ва гендер илмий-тадқиқот институти вакиллари, вилоят суди, вилоят бош имом-хатиби, отинойилар, вилоят “Нуроний” жамғармаси, вилоят Соғлиқни сақлаш бошқармаси, шунингдек, ОАВ вакиллари иштирок этди.

Семинарни Бош вазир ўринбосари — Оила ва хотин-қизлар қўмитаси раиси Зулайҳо Маҳкамова кириш сўзи билан очиб берди. У ўқув-семинарнинг асосий мақсади оиланинг тинчлиги ва фаровонлигини таъминлаш, мустаҳкам оилани шакллантириш, низоли оилалар билан манзилли ишлаш орқали муаммоларни ўз вақтида бартараф этиш, эрта никоҳ ва эрта туғруқ, шунингдек, ноқонуний никоҳларнинг олдини олишга қаратилган тизимли ҳамкорликни янада кучайтиришдан иборат эканини таъкидлади.

Шунингдек, никоҳни қайд этиш жараёнида никоҳ шартномасининг афзалликлари, миграция омиллари, ҳуқуқ-тартибот идоралари, адлия ва диний ташкилотлар, таълим тизими билан ҳамкорликда миллий қадриятларимизга таянган ҳолда ҳуқуқий ва тарбиявий аҳамиятга эга тарғибот ишларини кенгайтириш устувор йўналишлар сифатида қайд этилди. Бош вазир ўринбосари ўз сўзи якунида тинчлик ва осойишталик ҳукм сурган юртда фаровонлик мустаҳкам бўлишини, оилалар бахтли, хотин-қизлар ҳаётдан рози яшаши учун давлат идоралари ва жамоатчилик биргаликда масъулиятли ҳамкорликда ишлаши зарурлигини алоҳида урғулади.

Ўқув-семинар доирасида оилавий ажримларнинг сабаблари ва уларнинг олдини олиш чора-тадбирлари, никоҳлар сони камайишининг статистик таҳлили, оилаларни мустаҳкамлашда фуқаролик судлари томонидан амалга оширилаётган ишлар, оила барқарорлигини таъминлашда имом-хатиблар, отинойилар ҳамда давлат ва нодавлат ташкилотларининг ҳамкорлиги, репродуктив саломатлик, она ва бола саломатлигини муҳофаза қилиш каби мавзуларда соҳа мутахассислари маърузалари тингланди.

Семинар якунида вилоят ҳокими ўринбосари Комила Кавлонова сўзга чиқиб, вилоятда оила мустаҳкамлигини таъминлаш, хотин-қизларнинг жамиятдаги ўрни ва фаоллигини оширишга қаратилган таклиф ва тавсиялар учун ҳамкор ташкилотлар вакилларига миннатдорлик билдирди.